तास्मानिया होबार्ट ।

पछिल्लो समय युवापुस्तामाझ चर्चित गायिका वर्तिका एम राई सांगीतिक कार्यक्रमका लागि अष्ट्रेलिया आउने भएकी छन् । अंग्रेजी नयाँ वर्षको पूर्व सन्ध्याको अवसर पारेर गायिका राई अष्ट्रेलिया टुरमा आउन लागेकी हुन् । 

गायिका वर्तिका एम राईले ३० डिसेम्बरमा तास्मानियाको होबार्टमा सांगीतिक प्रस्तुति दिनेछिन् । हल्ला इभेन्टको अयोजनामा बुलिज अटोमोटिभले टाइटल स्पोन्सर गरेको उक्त कार्यक्रम होबार्टको ओरियन थियटरमा हुने छ । १५ सयबढी जनाको क्षमता भएको ओरियन थियटर तास्मानियाकै सबैभन्दा पुरानो मानिन्छ। यस थियटरमा नेपाली कार्यक्रम भने पहिलो पटक गरिँदैछ । 

वर्तिकाका विम्बाकाश र तरल गीत युवापुस्तामाझ चर्चित छन् । सरल शब्द, सशक्त कम्पोजिसन र काव्य शैलीको कारण उनका गीत रुचाइन्छन्। उक्त सांगीतिक कार्यक्रममा अर्थ ब्याण्ड, यात्र ब्याण्डका साथै गायक सार्गम राईले पनि प्रस्तुति दिने आयोजकले जनाएको छ ।

कार्यक्रमका लागि ७० प्रतिशत टिकट बिक्री भइसकेको हल्ला इभेन्टका संयोजक नविन श्रेष्ठले जानकारी दिए । बिक्री हुन टिकट थोरै मात्र भएकाले समयमै आफ्नो सिट सुरक्षित गर्न संयोजक श्रेष्ठले आग्रह गरेका छन् । 

हल्ला इभेन्टले तास्मानियमा रहेर विगत केही वर्षदेखि विभिन्न कन्सर्टको आयोजना आएको र अब निकट भविष्यमै यहाँ रहेका नेपाली संघ–सस्थासँग मिलेर सामाजिक कार्यमा पनि सहभागी हुने संयोजक श्रेष्ठले बताए । 

कार्यक्रम हलमा साँझ ७ बजेबाट प्रवेश गराइने छ । कार्यक्रममा प्रवेश गर्न १८ वर्ष माथिको भएको पहिचान खुल्ने परिचय पत्र लिएर आउन पनि आयोजकले आग्रह गरेका छन् ।