होबार्ट, अष्ट्रेलिया ।

अष्ट्रेलियामा रहेका सक्रिय नेपाली पत्रकारहरुको संगठन अष्ट्रेलियन नेप्लीज जर्नलिष्ट एशोसिएसन एन्जाको साधारणसभाले तीन बुँदे होबार्ट घोषणापत्र जारी गरेको छ । घोषणापत्रमा अष्ट्रेलियाको नेपाली पत्रकारितालाई अझ व्यवस्थित मर्यादित र यहाँको प्रेस काउन्सिलले तोकेको आचारसंहिताभित्र रही अघि बढाउने भनिएको छ । यसका साथै साधारणसभाले चिरञ्जिवी देवकोटाको नेतृत्वमा १३ सदस्यीय कार्यसमिति चयन गरेको छ ।

यस्ता छन् साधारणसभाले सार्वजनिक गरेका होबार्ट घोषणाका बुँदाहरु

१. पत्रकारिता समाजको अभिन्न अंग हो । व्यवसायिक पत्रकारिताले समाज निमार्णमा महत्वपूर्ण भूमिका खेल्दछ । अष्ट्रेलियामा नेपाली भाषाको पत्रकारितालाई थप व्यवसायिक, निष्पक्ष र तथ्यपरक बनाउनका लागि हामी अष्ट्रेलियन प्रेस काउन्सिलले निर्धारण गरेको आचारसंहिता र यहाँको कानूनी सिमाहरुलाई अक्षरस पालना गर्न कटिबद्ध छौं । पत्रकारिता समाजभन्दा बाहिर रहन सक्दैन भन्ने तथ्यलाई आत्मसाथ गर्दै असल, सूसुचित र एकताबद्ध समाज निर्माणमा योगदान दिन हामी व्यवसायिक पत्रकारितालाई जोड दिनेछौं ।

२. विदेशमा पनि नेपालीहरुका विभिन्न संघसंस्थाहरु सक्रिय छन् र त्यस्ता संगठनहरुको स्वतन्त्रता प्रति उत्तिकै सम्मान छ । पत्रकारितालाई व्यवसायिक बनाउने पाटोबाट हेर्दा, हामीले तयार पार्ने समाचारिय सामाग्रीहरु कुनै पनि राजनैतिक दल, क्षेत्र, वर्ग, जाती, धर्म, वर्ण र लिंगबाट निर्दिष्ट नभई, सिंगो नेपाल र नेपालीपनलाई उकास्नका लागि केन्द्रित रहनेछ । उल्लेखित विशेषताका आधारमा हामी हाम्रो पत्रकारितालाई प्रभावमुक्त राख्ने समेत प्रतिवद्धता गर्न चाहान्छौ ।

३. पत्रकारिता भनेको नियमित घटनाक्रमको जिम्मेववार अभिव्यक्ति हो । समाज विकासको तिब्रतासंगै पत्रकारितामा समेत प्राविधिक र दक्षताको खाचो टड्कारो बन्ने गरेको छ । समयको रफ्तारसंगै प्राविधिक र बद्लिदो समाजको भावना अनुसार दक्षता वृद्धी गर्न नसके, पत्रकारिताले समाजका आवश्यकताहरु पुरा गर्न सक्दैन । त्यसैले अष्ट्रेलियामा सक्रिय नेपाली पत्रकारहरुलाई समयअनुकुल दक्षता वृद्धी गर्न राज्यदेखि केन्द्रसम्मै विभिन्न प्रशिक्षण र कार्यशालाहरु गरिने समेत प्रतिबद्धता गर्न चाहान्छौं । जसका लागि राज्यदेखि संघीय तहसम्म रहेका सरकारी र गैरसरकारी संघसंस्थासंग सहकार्य गरि आवश्यक प्रशिक्षणहरुको व्यवस्था गर्नेछौं । समाजको अपेक्षा पुरा गर्न समेत हामी सामाजिक व्यक्ति र संघसंस्थासंग समेत छलफल र अन्तरक्रिया गर्नेछौं ।

अन्तमा समाजबिना पत्रकारिता संभव छैन । समाजको क्रिया र प्रतिक्रिया बिना पत्रकारिता न्याश्रो हुन्छ । पत्रकारितालाई व्यवसायिक बनाउनका लागि नेपाली समाजमा भएका व्यवसायहरुको विज्ञापन समेत आवश्यक छ । विज्ञापनले नै मिडिया हाउसलाई आर्थिक आम्दानीको बाटो खोलिदिन्छ । जसले व्यवसायिक पत्रकारिता गर्न संचारकर्मीलाई बाटो प्रसस्त गरिदिन्छ ।
यही घोषणा मार्फत हामी अष्ट्रेलियाको सिंगो नेपाली समाजलाई पत्रकारितामार्फत समाजलाई एकताको सुत्रमा बाध्ने यात्रामा सहकार्य गर्न अपिल समेत गर्दछौं ।

अध्यक्ष चिरञ्जीवी राज देवकोटा
उपाध्यक्ष कृष्ण तिवारी, प्रकाश हुमागाई, छत्र शंकर
महासचिव नारायण खड्का
कोषाध्यक्ष खगेन्द्र सत्याल
सचिव सरल गुरुङ
पब्लिक अफिसर गणेश भट्ट
प्रवक्ता तक्दीर अधिकारी
सदस्य प्रतीक सिग्देल