मेलबर्न, अष्ट्रेलिया ।

नेप्लीज एशोसिएसन अफ भिक्टोरियाको आयोजनामा आईतबार ३० अक्टोबर बाल दिवस आयोजना हुने भएको छ । हरेक वर्ष अन्तर्राष्ट्रिय बाल दिवसको सन्दर्भ पारेर प्रतिभा प्रस्फुटन कार्यक्रम गर्दै आएको न्याभले गएको दुईवर्षदेखि प्रत्यक्ष उपस्थितिमा बाल दिवस गर्न पाएको थिएन । यस पटक भने आईतबार स्थानीय कोबर्ग टाउन हलमा विभिन्न ८ समूहका नेपाली बालबालिकाहरुले आफ्नो प्रस्तुति दिनेछन् ।

न्याभका अध्यक्ष प्रेम उप्रेतिले यस पटकको बाल दिवसलाई लिएर बालबालिकाहरुमा उत्साह छाएको बताएका छन् । भिक्टोरियाका विभिन्न क्षेत्रमा सञ्चालन हुँदै आएका नेपाली भाषाका पाठशालाका साथै अन्य सामूदायिक संघ संस्था समेतको सहकार्यमा बालबालिकाहरुले आफ्नो प्रतिभा मञ्चमा प्रस्तुत गर्नेछन् ।

गीत, कविता, नाटक, नृत्य लगायतका प्रतिभा बाल दिवसमा हेर्न सकिनेछ ।
कोबर्ग टाउन हलमा आईतबार विहान १० बजेदेखि ३ बजेसम्म कार्यक्रम गर्न लागिएको उप्रेतिले केविसी अष्ट्रेलियालाई जानकारी दिए ।