काठमाडौं – नेपाल–चीन सीमा क्षेत्रमा पर्ने रसुवा जिल्लामा बुधबार आएको भीषण आकस्मिक बाढीले ठूलो जनधनको क्षति पुर्याएको छ। पछिल्लो पुष्टि विवरणअनुसार नेपालतर्फ कम्तीमा ८ जनाको मृत्यु भएको छ भने उद्धार तथा खोजी कार्य जारी रहेकाले मृतक तथा बेपत्ता हुनेको संख्या बढ्न सक्ने आशंका गरिएको छ। तिब्बती क्षेत्रमा रहेको हिमताल फुटेपनि त्यसको पानी सबै बगेर गइनसकेका कारण अझै अर्को बाढी आउनसक्ने अनुमान गरिएकाले अहिले नै राहत र उद्धारमा खटिएकाहरुले विशेष सतर्कता अपनाउनु आग्रह गरिएको छ । साथै, नदी तटीय क्षेत्रमा रहेकाहरुलाई सुरक्षित स्थानमा जान र सुरक्षाकर्मी र सरकारी निकायबाट प्राप्त सही सूचना मात्र विश्वास गर्न अनुरोध गरिएको छ ।
रसुवाको स्याफ्रुबेँसी, टिमुरे तथा आसपासका क्षेत्रमा बाढीले बस्ती, सडक, पुल र जलविद्युत् आयोजनाका संरचनामा व्यापक क्षति पुर्याएको छ। प्रभावित क्षेत्रमा पानीको बहाव अत्यधिक भएकाले उद्धारका लागि पठाइएका हेलिकोप्टरसमेत सहज रूपमा अवतरण गर्न नसकेको बताइएको छ।
तिब्बतको जिलोङमा पनि ठूलो क्षति
नेपालसँग सीमा जोडिएको चीनको तिब्बत क्षेत्रअन्तर्गत जिलोङ काउन्टीमा पहिरो र बाढीका कारण ठूलो मानवीय क्षति भएको तथा केही व्यक्ति बेपत्ता रहेको चिनियाँ समाचार माध्यमहरूले जनाएका छन्। घटनाले सडक सम्पर्क, विद्युत् तथा सञ्चार सेवा प्रभावित भएको बताइएको छ। तर तिब्बततर्फको मृतक र बेपत्ताको अन्तिम तथा विस्तृत संख्या अझै सार्वजनिक गरिएको छैन।
प्रधानमन्त्रीको आपतकालीन निर्देशन
प्रधानमन्त्री बालेन्द्र शाहले घटनापछि उद्धार र राहत कार्यलाई तीव्र बनाउन सुरक्षा निकाय तथा सम्बन्धित निकायलाई परिचालन गरिएको बताएका छन्। उनले नदी किनार र जोखिमयुक्त तल्लो क्षेत्रमा बसोबास गर्ने नागरिकलाई सुरक्षित स्थानमा जान तथा उच्च सतर्कता अपनाउन आग्रह गरेका छन्।
प्रधानमन्त्रीले उद्धार, राहत र प्रभावितको सुरक्षाका लागि सेना, प्रहरी तथा अन्य निकायलाई समन्वयात्मक रूपमा परिचालन गर्न निर्देशन दिएको जनाइएको छ। प्रभावित क्षेत्रमा खोज तथा उद्धार कार्य जारी छ।
४३० मेगावाट विद्युत् उत्पादन प्रभावित
बाढीका कारण रसुवा क्षेत्रका विभिन्न जलविद्युत् आयोजनामा समेत गम्भीर असर परेको छ। नेपालको ऊर्जा मन्त्रालयका अनुसार करिब ४३० मेगावाट विद्युत् उत्पादन क्षमता प्रभावित भएको छ, जुन नेपालको कुल जलविद्युत् उत्पादन क्षमताको उल्लेख्य हिस्सा हो।
कारण अझै खुल्न बाँकी
बाढीको वास्तविक कारणबारे अनुसन्धान भइरहेको छ। भोटेकोशी नदीको उद्गम तिब्बत क्षेत्रमा पर्ने भएकाले माथिल्लो क्षेत्रमा आएको बाढी वा पहिरोका कारण पानीको ठूलो बहाव नेपालतर्फ आएको हुन सक्ने अनुमान गरिएको छ। यद्यपि घटनाको आधिकारिक कारण अझै पुष्टि भइसकेको छैन।
चिनियाँ राष्ट्रपति सी जिनपिङको निर्देशन
घटनापछि चीनका राष्ट्रपति सी जिनपिङले बेपत्ता व्यक्तिको खोजीलाई तीव्र बनाउन तथा सम्भावित थप विपद् रोक्न निगरानी र पूर्वसूचना प्रणाली सुदृढ गर्न निर्देशन दिएका छन्।
नोट: खोज, उद्धार र क्षति विवरण संकलन जारी रहेकाले मृतक, बेपत्ता तथा क्षतिको संख्या परिवर्तन हुन सक्छ। KBC खबरले आधिकारिक र विश्वसनीय स्रोतबाट पुष्टि भएका विवरणलाई प्राथमिकता दिँदै समाचार अद्यावधिक गर्नेछ।
प्रतिक्रिया