मेलबर्न । मेलबर्नको उत्तरी उपनगर क्रेगीबर्नमा १५ वर्षीय किशोरको छुरा प्रहारबाट मृत्यु भएको घटनामा प्रहरीले दुई जनालाई पक्राउ गरेको छ। पक्राउ पर्नेमा १६ वर्षीय किशोर र २० वर्षीय युवक रहेका छन्। उनीहरूलाई बिहीबार बिहान पास्को भेल क्षेत्रबाट पक्राउ गरी हत्या अनुसन्धान टोलीले सोधपुछ गरिरहेको छ।

घटना बुधबार साँझ करिब ७:५० बजे क्रेगीबर्न कम्युनिटी अस्पताल नजिकको लाइगन ड्राइभ क्षेत्रमा भएको हो। गम्भीर छुरा प्रहारबाट घाइते अवस्थामा भेटिएका किशोरलाई अस्पतालका कर्मचारीले तत्काल सीपीआर दिए पनि घटनास्थलमै उनको मृत्यु भएको प्रहरीले जनाएको छ। मृतक मिकलह्यामका १५ वर्षीय किशोर रहेको बताइएको छ।

घटनापछि प्रहरीले व्यापक अनुसन्धान सुरु गरेको छ। अस्पताल परिसर र वरपरका सीसीटीभी फुटेज परीक्षण भइरहेको छ भने घटनास्थलबाट बरामद भएका प्रमाणहरू फरेन्सिक परीक्षणका लागि पठाइएको छ। प्रहरीले आक्रमण अस्पताल परिसरमै भएको हो वा अन्यत्रबाट घाइते अवस्थामा त्यहाँ ल्याइएको हो भन्ने विषयमा पनि अनुसन्धान गरिरहेको जनाएको छ।

हालसम्म पक्राउ परेका दुवै व्यक्तिविरुद्ध औपचारिक अभियोग दर्ता गरिएको छैन। प्रहरीले घटनाको कारण र पृष्ठभूमिबारे अनुसन्धान जारी रहेको जनाएको छ। साथै घटनासम्बन्धी जानकारी वा भिडियो फुटेज भएका व्यक्तिलाई क्राइम स्टपर्समार्फत जानकारी उपलब्ध गराउन आग्रह गरिएको छ।