काठमाडौँ । नेपाल सिंगापुरमा जारी एसियन गेम्स पुरुष क्रिकेट छनोट प्रतियोगिताको फाइनलमा प्रवेश गरेको छ । सिङ्गापुरको राष्ट्रिय क्रिकेट स्टेडियममा आइतबार भएको सेमिफाइनल खेलमा नेपालले ओमानलाई आठ विकेटले हरायो । नेपालले यसअघि नै एसियन गेम्समा स्थान बनाईसकेको छ ।

जितका लागि ओमानले दिएको ९५ रनको सामान्य लक्ष्य नेपालले ९।२ ओभरमा दुई विकेटको क्षतिमा पूरा गरेको हो । नेपालका लागि लोकेश बमले सर्वाधिक अविजित ४४ रन बनाए । उनले २६ बलमा सात चौका र एक छक्का हानेका थिए । ओपनर कुशल भुर्तेलले २० र रोहित पौडेलले अविजित २१ रन बनाउने सफलता पाए । बलिङमा ओमानका समिर ओथामनले दुई विकेट लिएका थिए ।
यसअघि टस जितेर पहिले ब्याटिङ गरेको ओमानले १९।४ ओभरमा सबै विकेटको क्षतिमा ९४ रन बनाएको थियो । ओमानका लागि कप्तान सफियान मोहम्मद सर्वाधिक ३८ रन बनायो । जुबिर अली अकबरले २२ र अबदुल्जाली खानले १६ रन जोडेका थिए ।

बलिङमा नेपालका करण केसीले तीन विकेट लिएका थिए । सोमपाल कामी र सन्दीप लामिछानेले दुई दुई तथा कुशल मल्ल, शाहब आलम र कप्तान दीपेन्द्रसिंह ऐरीले एक एक विकेट लिने सफलता पाए ।
पराजित ओमानले पनि यसअघि नै एसियन गेम्समा स्थान बनाईसकेको छ । उपाधिका लागि नेपालले मलेसिया र हङकङबिचको सेमिफाइनल विजेतासँग सोमबार प्रतिस्पर्धा गर्नेछ ।