काठमाडौँ । विपन्न परिवारमा जन्मिएको र स्कुले शिक्षा पूरा गर्दा पनि मावलीमा बसेर पढेको बताइरहेका पूर्वगृहमन्त्री सुधन गुरुङको विषयमा सरकारले बनाएको छानविन समितिले आज प्रतिवेदन बुझाउँदैछ । पढाई सकेपछिको करिब १० वर्षकै बिचमा करोडौंको सम्पत्ति जोडेको देखिएका उनले गरेको लगानी सम्पत्ति विवरणमा लुकाएको पाइएपछि चर्को आलोचना भएको थियो । यसलाई छानविन गर्नेभन्दै उनले राजीनामा दिएका थिए । उनलाई प्रधानमन्त्री बालेन्द्र साहले राजीनामा दिन सुझाएको बताइए पनि त्यसपछि अर्को कसैलाई गृहमन्त्रालय जिम्मा नदिएको अवस्थामा उनलाई नै फिर्ता ल्याउने तयारी भइरहेको धेरैले आशंका गरेका छन् ।
पूर्वगृहमन्त्रीबारे समितिले गुरुङसँग बयान लिने, सम्पत्ति विवरण अध्ययन गर्ने लगायतका कार्य पूरा गरेपछि प्रतिवेदन बुझाउन लागिएको समितिका सदस्य अच्युतमणि नेउपानेले जानकारी दिए।
उनका अनुसार प्रतिवेदनमा दोषी वा निर्दोष जे भए पनि प्रमाणका आधारमा स्पष्ट निष्कर्षसहित राय प्रस्तुत गरिएको छ । मन्त्रिपरिषद्को वैशाख २८ गतेको बैठकले उच्च अदालतका पूर्वन्यायाधीश अच्युतप्रसाद भण्डारीको अध्यक्षतामा तीन सदस्यीय समिति गठन गरेको थियो। समितिमा महालेखा नियन्त्रक शोभाकान्त पौडेल र सहन्यायाधिवक्ता अच्युतमणी नेउपाने सदस्य रहेका छन्।
समितिलाई प्रतिनिधिसभा सदस्यसमेत रहेका पूर्वगृहमन्त्री गुरुङसँग सम्बन्धित सार्वजनिक रूपमा उठेका विषयको सत्यतथ्य अध्ययन तथा छानबिन गरी १५ दिनभित्र सरकारसमक्ष प्रतिवेदन पेश गर्ने जिम्मेवारी दिइएको थियो।
व्यापारी दीपक भट्टसँग व्यापारिक साझेदारी रहेको विषय सार्वजनिक भएपछि गुरुङ विवादमा तानिएका थिए। त्यसपछि उनले वैशाख ९ गते गृहमन्त्री पदबाट राजीनामा दिएका थिए। उनी २६ दिनमात्रै गृहमन्त्रीको जिम्मेवारीमा रहेका थिए।
सम्पत्ति शुद्धीकरण अनुसन्धान विभागको थुनामा रहेका भट्टको लिबर्टी माइक्रो इन्स्योरेन्स र स्टार माइक्रो इन्स्योरेन्सको सेयर खरिद गरेको विषयमा प्रश्न उठेपछि गुरुङमाथि दबाब बढेको थियो । रकमको स्रोतबारे प्रश्न उठेपछि गुरुङले आफूले सापटी लिएर करिब ५० लाख रुपैयाँ बराबरको सेयर खरिद गरेको दाबी गर्दै आएका छन्।