होबार्ट, अस्ट्रेलिया। तस्मानियाको होबार्टस्थित कोरोङ्गी डिमेन्सिया भिलेजमा यसपालि पहिलोपटक दशैं फेष्टिभल उत्साहसहित मनाइएको छ। नेपाली समुदायकै पहलमा आयोजना गरिएको कार्यक्रमलाई यहाँका सरकारी र स्थानीय समूदायका व्यक्तिहरूको उल्लेखनीय उपस्थितिले भव्य बनाएको थियो। प्रमुख कार्यकारी अधिकृत डेमियन ज्याकब्स र फेसिलिटी म्यानेजर सामन्था क्रेगको उपस्थितिमा आयोजित कार्यक्रमको संयोजन समिर खरेलले गरेका थिए।

५० भन्दा बढीको सहभागितामा भएको कार्यक्रममा गीत, संगीत र नृत्यका प्रस्तुतिहरू समेटिएका थिए । समिर खरेल, बिकास श्रेष्ठ र भीम भट्टराईले प्रस्तुत गरेको शास्त्रीय संगीत, सुमिना थापा र समीक्षा थापाको नृत्य तथा रोनीश महर्जनको गायन कार्यक्रमको आकर्षण थियो । म्यानेजर सामन्था क्रेगले उपस्थित कर्मचारीलाई टिका लगाइदिएकी थिइन् । यस्तै कर्मचारीसँगै रेसिडेन्ट्सहरूले समेत टिका ग्रहण गर्दै दशैंको आत्मीयता र आशीर्वाद अनुभूत गरेका थिए ।

कोरोङ्गी डिमेन्सिया भिलेजमा कार्यरत नेपालीहरूको सक्रियताकै कारण यसपालि पहिलोचोटि दशैं पर्व आयोजना गर्न सम्भव भएको समिर खरेलले केबि खबरलाई बताए।। कार्यक्रममा नेपाली मात्र नभई अन्य समूदायका कामदार र रेसिडेन्ट्सहरूको पनि उत्साहपूर्ण सहभागिता थियो।

तस्मानिया आफैंमा बहुसांस्कृतिक राज्य हो। पछिल्ला वर्षमा यहाँ नेपालीहरूको उपस्थिति उल्लेखनीय बनेको छ। पढाइ, रोजगारी र व्यवसायका कारण नेपालीहरूको बसोबास बढेसँगै उनीहरूको योगदान तस्मानियाको सामाजिक र सांस्कृतिक जीवनमा स्पष्ट देखिन्छ। यस किसिमका कार्यक्रमहरूले नेपाली समुदाय मात्र होइन, सम्पूर्ण तस्मानियालाई विविधताभित्र एकताको सन्देश दिएको आयोजकहरूको भनाइ छ।