काठमाडौँ । सानो समूहले पनि हिंसात्मक आन्दोलन गर्न सकेको भन्दै क्षमतामाथि प्रश्न उठिरहेका गृहमन्त्री रमेश लेखकले संसदको राज्यव्यवस्था समितिमा प्रहरीकै पत्रकार सम्मेलनमा बताइएका तथ्यहरु लिएर सरकारी कदमको बचाउ गर्ने प्रयास गरेका छन् । उनले वर्तमान व्यवस्था उल्ट्याउने र निरङ्कुशता थोपर्ने काम सरकारलाई स्वीकार्य नहुने बताएका छन् । प्रतिनिधिसभाको राज्य व्यवस्था तथा सुशासन समितिको बैठकमा चैत १५ गते राजावादीहरूले तीनकुनेमा गरेको हिंसात्मक आन्दोलनबारे जानकारी गराउँदै सरकार हिंसात्मक गतिविधि हेरेर नबस्ने बताएका हुन् ।

‘सरकारलाई वर्तमान व्यवस्था उल्ट्याउने र निरङ्कुशता थोपर्ने काम स्वीकार्य छैन । यस्ता गतिविधि गर्ने कार्य गर्न सरकारले दिँदैन,’ गृहमन्त्री लेखकले भने, ‘संविधान च्यात्ने र हिंसात्मक गतिविधिलाई हामी हेरेर बस्दैनौँ ।’
उनी समितिमा सरकारी सुरक्षा निकायका प्रमुखहरुसहित उपस्थित भएका थिए । राजवादीको आन्दोलनमा चरम वितण्डा मच्चाउँदा पनि दुर्गा प्रसाईलाई किन पक्राउ गरिएको थिएन ? उनलाई पक्राउ गरेर पनि किन छोडिएको हो ? यी विषय यतिबेला आम सर्वसाधारणले उठाइरहेका छन् ।

यस्तै हिंसात्मक आन्दोलन भयो भन्दैमा बलको अत्यधिक प्रयोग किन गरिएको थियो ? यसको जवाफ पनि सरकारले दिन सकेको छैन । निजी सम्पत्तिमा आगजनी र तोडफोड हुँदा, पत्रकारलाई बचाउने अवस्था हुँदाहुँदै पनि सरकारी उपस्थित किन हुन सकेन धेरै प्रश्न अनुत्तरित छन् । सरकार यी सबैको दोष राजावादीलाई लगाएर कारवाहीको दायरामा ल्याउने प्रयत्नमा छ ।