तास्मानियामा VXL Education Tasmania को आयोजनामा राष्ट्रिय क्रिकेट आइकन बिक्रम सोबलाई स्वागत गरिएको छ। नेपाली क्रिकेटप्रति उल्लेखनीय योगदान दिएका सोबको सम्मानमा आयोजित कार्यक्रममा समुदायका विभिन्न क्षेत्रका अगुवाहरूको उपस्थिति रहेको थियो। कार्यक्रममा तास्मानियन नेपाली क्रिकेट संघ (TNCA) का अध्यक्ष कमल भण्डारी, नेपाली व्यवसायी संघ (NBA) का सचिव अरुण आचार्य, अस्ट्रेलिया नेपाल पत्रकार संघ (ANJA) का कोषाध्यक्ष खगेन्द्र सत्याल, गुरखा लेजेन्डका अध्यक्ष प्रकाश उप्रेती लगायत विभिन्न संघसंस्थाका प्रतिनिधिहरूले खेलाडी सोबलाई स्वागत गरेका थिए ।

नेपालका राष्ट्रिय खेलाडी अमृत भट्टराई विशेष अतिथिका रूपमा सहभागी भएको कार्यक्रममा नेपालबाट आइपुगेका अभिभावकहरू पनि सहभागी भई राष्ट्रिय खेलाडीले पाएको सम्मान गौरवलाग्दो भएको प्रतिक्रिया दिएका थिए । VXL Education Tasmania का निर्देशक बिष्णु सापकोटाले कार्यक्रमले नेपालबाट आएका खेलाडीहरूलाई थप हौसला प्रदान गर्ने र भविष्यमा आउने नयाँ प्रतिभाहरूका लागि एक उदाहरण स्थापित गर्ने विश्वास व्यक्त व्यक्त गरेका थिए । साथै, बिक्रम सोबको तास्मानिया बसाइ सफल रहोस् भन्ने कामना पनि गरेका थिए ।