मेलबर्न, अष्ट्रेलिया ।

भिक्टोरिया राज्यको शेपार्टनमा सञ्चालित दोश्रो शेपार्टन नेशन कप २०२५ को उपाधि चुम्न नेपाली टिम असफल भएको छ । साविक विजेता अष्ट्रेलियालाई समेत पराजित गर्दै अघि बढेको टिमले अन्तिम खेलमा अफगानिस्तानसँग पराजयको सामना गर्नु परेको हो । निर्धारित ९० मिनेटको खेलमा बराबरी भएपछि थपिएको अतिरिक्त समयमा समेत कुनै गोल हुन सकेन । पेनाल्टी सुटआउटमा नेपाल ४ का विरुद्ध ५ गोलले पराजित हुन पुग्यो ।

फाईनल खेल हेर्नका लागि मेलबर्न लगायतका विभिन्न ठाउँबाट दर्शकहरु शेपार्टन पुगेका थिए । पहिलो पटक सहभागिता जनाएको प्रतियोगिताको दोश्रो संस्करणमा नेपालको प्रदर्शन उच्च थियो ।

नेपाललाई दावेदारको रुपमा हेर्न थालिएको थियो भने स्थानीय समूदायकाबीचमा नेपाली खेलाडीहरुको स्कील र खेल भावनाको प्रशंसा भएको थियो । प्रतियोगितामा नेपाली राष्ट्रिय टिमका पूर्व खेलाडीहरु सागर थापा लगायतको समेत उपस्थिति थियो ।