काठमाडौं । सहकारी ठगी प्रकरणमा नक्कली डिभोर्स गरेर उन्मुक्ति खोजेका काँग्रेस केन्द्रीय उपसभापति धनराज गुरुङसँग सीआईबीले दोश्रो पटक बयान लिएको छ । ललितपुरको मितेरी सहकारी ठगी प्रकरणबारे प्रहरीको केन्द्रीय अनुसन्धान ब्यूरोले उनलाई सोधपुछ गरेको हो ।

सीआईबीको कार्यालय लाजिम्पाटमा बोलाएर मंगलबार गुरुङमाथि सोधपुछ गरिएको थियो । यो सूचनालाई खासै बाहिर ल्याउन नचाहे पनि पत्रकारहरुले प्रश्न गरेपछि सीआईबीले बयान भएको स्वीकार गरेको छ ।

‘आज दोस्रो पटक उहाँलाई बोलाएर घटना विवरण कागज गराएका छौं । अनुसन्धानमा सहयोग गर्छु भन्नुभएको छ’ प्रहरी श्रोतले भन्यो ।

साढे १२ बजे सीआईबीको कार्यालयमा पुगेका गुरुङमाथि दिउँसो ५ बजेसम्म सोधपुछ गरिएको थियो ।

यसअघि २८ कात्तिकमा सीआईबीले गुरुङलाई आफ्नो कार्यालयमा बोलाएर सोधपुछ गरेको थियो ।

मितेरी सहकारीको साढे १२ करोड हिनामिना गरेको भन्दै सहकारीका सचिव बोधबिक्रम थापाले महाप्रबन्धक ज्योति गुरुङसहित ५ जनाविरुद्ध सीआईबीका उजुरी दिएका थिए ।

त्यसपछि यो सहकारीको अनुसन्धान सीआईबीले सुरु गरेको थियो । यो सहकारी ठगी प्रकरणमा धनराजकी पूर्वपत्नी ज्योति गुरुङ र ज्योतीबहादुर भण्डारीविरुद्ध रेड नोटिस समेत जारी भएको छ । तर उनीहरू पक्राउ पर्न सकेका छैनन् ।