मेलबर्न, अष्ट्रेलिया ।
मेलबर्नमा सम्पन्न भएको काठमाडौं प्रोपर्टिज कप ५ ए साईड फुटसल प्रतियोगिताको उपाधि यति फुटबल क्लब ब्लूले जितेको छ । प्रतियोगितामा आफ्नै क्लबको यति फुटबल क्लब रेडसँग फाईनलमा भिडेको टिमले उपाधि हात पारेको हो ।
क्रेगिबर्न ब्रिगेड स्पोर्टस क्लबले आयोजना गरेको प्रतियोगितामा बेष्ट प्लेयर सुमन लामा घोषित भए भने बेष्ट किपर एलन न्यौपाने बन्न सफल भए । त्यस्तै सबैभन्दा बढी गोल गर्ने उपाधि आशिष लामाले प्राप्त गरे । प्रतियोगिताको फेयर प्ले एवार्ड नर्थ पिक फुटबल क्लबले पाएको छ ।
प्रतियोगितापछि केविसीखबरसँग कुरा गर्दै क्रेगीबर्न ब्रिगेडका अध्यक्ष माधव पौडेलले उत्साहजनक रुपमा प्रतियोगिता सकिएको जानकारी दिए । उनले यस कार्यमा सहयोग गर्ने सबैलाई धन्यवाद दिँदै आगामी वर्ष पनि प्रतियोगितालाई निरन्तरता दिइने प्रतिबद्धता पनि जनाएका छन् ।

यस्तै एभरेष्ट होम लोन्स लिजेन्ड्स कप प्रतियोगिताको उपाधि पनि यति फुटबल क्लबले नै जितेको छ । ३५ वर्षभन्दा माथि उमेर समूहका खेलाडी सहभागी हुने यो प्रतियोगितामा हिमालयन फुटबल क्लब दोश्रो भयो भने पंकज लामिछाने बेष्ट प्लेयर, समिर तामांग बेष्ट किपर, सागर थापा सबैभन्दा बढी गोलकर्ता बन्न सफल भए । प्रतियोगिताको फेयर प्ले एवार्ड दि हिमालयन टाईगर्सले प्राप्त गर्न सफल भएको छ । प्रतियोगितामा खुलातर्फ १६ टिमको सहभागिता थियो भने लिजेन्डस कपमा ८ टिमले प्रतिस्पर्धा गरेका थिए ।