मेलबर्न अष्ट्रेलिया ।

गैर आवासीय नेपाली संघ (एनआरएनए) को केन्द्रीय सचिवमा डा ज्ञानेन्द्र रेग्मीले उम्मेदवारी घोषणा गरेका छन्। एनआरएनए अष्ट्रेलियाका महासचिव भइसकेका डा रेग्मीले आगामी कार्यकालका लागि एनआरएनएको केन्द्रीय सचिव पदमा उम्मेदवारी घोषणा गरेका हुन्।

एक दशक भन्दा लामो एनआरएनएको अनुभव भएका डा रेग्मी विगत १५ वर्षदेखि अष्ट्रेलियाको सिड्नीमा बस्दै आएका छन्।

उम्मेदवारी घोषणा गर्दै उनले एक दशकमा एनआरएनएको सबै गतिविधिहरुमा सहभागी हुँदै आएको भन्दै संस्थाको गिर्दो शाखलाई बचाउने अभियानको मूल प्रवाहमा रहेर सक्रिय रूपमा लागि रहेको बताएका छन्।

उनले संसारभर छरिएर रहेका गैर आवासीय नेपाली साथीहरूबिच संजाललाई सदुपयोग गर्दै वैदेशिक रोजगारीमा रहेका नेपालीका समस्याहरूलाई समाधान गर्नको लागि आफूले जानेको ज्ञान र सिपलाई सदुपयोग गर्ने योजना बनाएको बताएका छन्।

अस्ट्रेलियामा रहेर इन्जिनियर र प्राध्यापन पेसामा रहँदा आर्जन गरेको अनुभवलाई यस अभियानमा सदुपयोग गर्न उम्मेदवारी दिएको उनको भनाइ छ। उनी सन् २००४ मा अध्ययनका लागि जापान गएका थिए। जापानपछि न्युजिल्याण्ड हुँदै अस्ट्रेलियालाई कर्मथलो बनाएका रेग्मी एनआरएनए अभियानमा सक्रिय अभियान्ता मानिन्छन्।

सचिव पदका प्रत्यासी डा ज्ञानेन्द्र रेग्मीले आफ्ना चुनावी प्रतिबद्धता पनि सार्वजानिक गरेका छन्। डा रेग्मीले विभिन्न ९ बुँदामा प्रतिबद्धता सार्वजानिक गरेका हुन्।

प्रतिबद्धता यस्ता छन्:-
१-‘एक पटकको नेपाली सधैंको नेपाली’ : विदेशमा बस्ने हामीहरूले खोजेको नेपाली नागरिकताको निरन्तरता हो। यसका लागि नेपाल सरकारसँग निरन्तर लविङ गर्नेछु । अहिले नेपाल सरकारले प्रदान गर्दै आएको एनआरएन नागरिकतालाई उपलब्धीको रुपमा लिदै गैरआवासीय नागरिकता चाँडोभन्दा चाँडो सहज तरिकाले वितरण गर्न नेपाल सरकारका सम्बन्धित सरोकारवाला निकायसँग परामर्श गर्नेछु।

तीन पुस्तामा सीमित यो नागरिकताले गैरआवासीय नेपालीको भावनालाई नेपालसँग जोडाउने भन्दा टुटाउने काम गर्छ। नेपालमा लगानी भित्र्याउने भन्दा नेपालबाट लगानी बाहिर्याउने भूमिका खेल्न सक्छ। त्यसैले यो तीन पुस्ते व्यारियर हटाउन नेतृत्वमार्फत तत्कालै पहल गर्नेछु । विकल्पमा तत्काललाई सात पुस्तासम्म पुयाउन आधारसहित कार्यपत्र पेश गरेर नेपाल सरकारसँग लबिङ गर्नेछु । यद्यपि हाम्रो माग नेपाली नागरिकताको निरन्तरता नै हो।

२- गैरआवासीय नेपाली नागरिकता प्राप्त भएपछि अब गैरआवसिय नेपाली संघको उद्देश्यहरु रिभ्यु गरी प्राथमिकतामा राखेर संघको अबको १० वर्षको ठोस कार्यदिशा र योजना बनाउन पहल गर्नेछु ।

३- गैरआवासीय नेपालीहरुलाई नेपालमा सामूहिक लगानी गर्न मनोवल बढाउन नेपाल सरकारका सम्बन्धित निकायसँग सहकार्य गर्दै विभिन्न मोडलका योजना निर्माण गर्नेछु। समृद्ध नेपाल बोलिमा होइन योजना नै बनाएर नेपाल सरकारलाई कार्यपत्र पेश गर्न काम गर्नेछु।

४- ज्ञान, सीपको आदान प्रदान गर्न ठोस कार्यक्रम बनाएर व्यवासायी, बौद्दिक वर्ग र पेशाकर्मीहरुसँग छलफल र सहकार्य गर्नेछु।

५- वर्तमान समयमा आइसीसीका अधिकांश कामहरूलाई एनसीसीहरूले हरेक प्रकारले सहयोग गर्दै आइरहेकोमा आगामी दिनमा आइसीसीले एनसीसीलाई पनि अझ बढी सहयोग गर्ने वातावरणको सिर्जना गर्नेछु । दोहोरो सहकार्यका लागि भूमिका खेल्नेछु ।

६- आइसीसी र एनसीसीको प्रत्यक्ष कम्युनिकेसनको वातावरण बनाउनेछु।

७- विगत केही वर्षदेखि देखिएको एनसीसी र आइसीसीबीचको प्रतिधिनिधि विवाद हटाउन सबै एनसीसीको कार्यसमितिको अभिलेखालय राखेर संगठन पारदर्शी बनाउँदै प्रतिनिधि विवाद सधैको लागि अन्त्य गर्नेछु ।

८- आइसीको योजना अनि कार्यक्रमहरूलाई हरेका एनसीसीसम्म पु¥याउन समन्वयकारी भूमिकामा खेल्नेछु।

९- आइसीसी सचिवको रुपमा महासचिव र अध्यक्षलाई साथ दिँदै समितीमा सकृय भूमिका खेल्नेछु।