काठमाडौं २ माघ । एसेज श्रृङ्खला अष्ट्रेलियाले ४–० ले जितेको छ । होबार्टमा भएको पाँचौ तथा अन्तिम टेष्टमा इंल्याण्डलाई एक सय ४६ रनले हराएसँगै अष्ट्रेलियाले ४–० ले श्रृङ्खला आफ्नो पक्षमा पारेको हो ।
पाँचौँ टेष्ट जित्न दुई सय ७१ रनको लक्ष्य पछ्याएको इंल्याण्ड तेस्रो दिनको खाना समयपछि एक सय २४ रन बनाउँदा अलआउट भयो । ६८ रन बनाउँदासम्म कुनै पनि विकेट नगुमाएको इंल्याण्डले बाँकी ५६ रन बनाउँदा १० विकेट गुमायो । उसका लागि ज्याक क्राउलीले ३६ र रोरी बन्र्सले २६ रन बनाए । अष्ट्रेलियाका प्याट कमिन्स, स्कट बोलान्ड र क्यामरन ग्रिनले तीन, तीन तथा मिचेल स्टार्कले एक विकेट लिए । अष्ट्रेलियाा ट्रेभिस हेड एसेजकै उत्कृष्ट खेलाडी घोषित भए ।
पाँचौ टेष्टमा तीन दिनमा ४० विकेट झरेका छन् । सन् १९१० यता कुनै पनि टेष्ट श्रृङ्खलामा ४० विकेट झरेको थिएन । पाँचौ टेष्टको पहिलो पारीमा अष्ट्रेलियाले तीन सय तीन रन बनाएको थियो भने दोस्रो पारीमा एक सय ५५ रन बनायो । यस्तै इंल्याण्डले पहिलो पारीमा एक सय ८८ र दोस्रो पारीमा एक सय २४ रन बनायो । सबै पारीमा दुवै टिम अलआउट भए ।
एसेज श्रृङ्खलाका सबै खेलमा अष्ट्रेलिया हावी भयो । अष्ट्रेलियाले पहिलो खेल नौ विकेटले, दोस्रो खेल दुई सय ७५ रनले र तेस्रो खेल एक इनिङ्स र १४ रनले जितेको थियो । चौथो खेल भने इंल्याण्डले संघर्षपूर्ण बराबरीमा रोक्न सफल भएको थियो ।