मेलबर्न अष्ट्रेलिया ।

लिभेन्टस ओसेनियाको व्यवस्थापनमा ‘मेलोडी म्युजिकल नाइट अष्ट्रेलिया टुर २०२३’ हुने भएको छ । अहिलेको युवा पुस्ताका चर्चित गायक प्रताप दास, सनिष श्रेष्ठ र गायीका प्रविशा अधिकारीलाई लिएर लिभेन्टस ओसेनियाले ‘मेलोडी म्युजिकल नाइट अष्ट्रेलिया टुर २०२३’ गर्न लागेको हो । 

अलाइन्स स्टेट एजेन्ट टाइटल स्पोन्सर रहेको उक्त सांगीतिक टुरले अष्ट्रेलियाको सिड्नी, क्यानबेरा, पर्थ, मेलबर्न र तास्मानिया गरी ६ सहरमा सांगीतिक कार्यक्रम गर्ने लिभेन्टस ओसेनियाका सन्दिप श्रेष्ठले जानकारी दिए । लिभेन्टस ओसेनियाको सांगीतक अष्ट्रेलिया टुर मे १३ देखि २२ सम्म चल्ने उनले बताए। यो सांगीतिक यात्रामा गायीका प्रविशा अधिकारीको विषेश प्रस्तुती रहने उनकाे भनाइ छ ।

प्रताप दास ‘नेपाल आइडल’को रनरअप हुनु भने सनिष श्रेष्ठ ‘दि भ्वाइस अफ नेपाल–२’ को टप ४ मा पर्न सफल गायक हुन्। नेपाली सांगीतिक क्षेत्रका उदयमान गायक दासले फिल्म ‘प्रेमगीत २’ को ‘मोटरसाइकल’, ‘नाइँ नभन्नु ल’ को ‘अलिकति स्वीट’, ‘रोज’ को  ‘फूल होइन काँडा’ गीतमा स्वर दिएका छन् । 

यस्तै गायीका प्रविशा अधिकारीले धेरै नेपाली चलचित्रको गीतमा स्वर दिएकी छन् । ‘दि भ्वाइस अफ नेपाल’की कोच समेत रहेकी गायीका प्रविशा अधिकारीका दोष, फूल होइन, तिमि जे सुकै गर, भूपू माया, रुनु पर्लानी लगायतका गीतहरु चर्चामा छन् । गायक श्रेष्ठले लैलै, रंग, लेखिएका शब्द, मरी जाउ, माया संसार, के यो माया हो जस्ता गीतहरु ‘दि भ्वाइस अफ नेपाल’ मा गायर चर्चा कमाएका थिए ।