Logo

विमानमा स्याल ठोक्कियो, यात्रु र जहाज सुरक्षित



काठमाडौं, ८ मंसिर । बाँकेको नेपालगन्ज विमानस्थलमा विमानमा स्याल ठोक्किएको छ । काठमाडौंंबाट नेपालगञ्ज गएको बुद्ध एयरको एब्रो जहाज नेपालगञ्ज विमानस्थलमा अवतरण गर्ने क्रममा विमानमा स्याल ठोक्किएको हो । बुधबार साँझ ७ बजेर ५ मिनेटमा विमान अवतरण गरिरहेको बेला धावनमार्गमा स्यालसँग ठोक्किएको नागरिक उड्यन कार्यालय नेपालगञ्जले जनाएको छ ।
बुद्ध एअरको विमान अवतरण गरेर धावनमार्गमा दौडिरहेको बेला स्यालसँग ठोक्किएको हो । तर विमान तथा यात्रुहरु सबै सुरक्षित रहेको सो कार्यालयका प्रमुख सुभाष झाले बताउनुभयो । उहाँले सो विमान अवतरण गरे लगत्तै श्री एअरको विमान समेत अवतरण गरेको जनाउँदै धावनमार्गमा गएर हेर्दा स्यालका शरीरका भागहरु टुक्रा भएको अबस्थामा फेला परेको बताउनुभयो
सो घट्ना पश्चात एक घण्टादेखि विमानस्थलबाट कुनै उडान नगरिएको र श्रीएयरले काठमाडौका लागि उडान गर्ने तयारी गरेको विमानस्थलले जनाएको छ ।
स्याल ठोक्किएको विमानको परीक्षण गरेर मात्रै उडान गरिने हुँदा बुद्ध एयरको अर्को विमान काठमाडौबाट आइरहेको पनि नागरिक उड्यन कार्यालयले जनाएको छ । स्याल ठोक्किँदा जहाजको नोजल गेयरमा समस्या आएकोले सो चेकजाँचका लागि काठमाण्डौबाट इञ्जिनियरको टोली बाँकै आइरहेको जिल्ला प्रहरी कार्यालय बाँकेका प्रवक्ता डीएसपी मधुसुदन न्यौपानेले बताउनुभयो । दुई साता अघि मात्र नेपालगञ्जबाट मुगु उडानको लागि धावन मार्गमा दौडीरहेको सीता एयरको टुइनेटर जहाजमा तीन वटा बँदेल ठोक्किएका थिए ।