काठमाडौँ ।

गैरआवासीय नेपाली संघ (एनआरएनए) आरके शर्मा समूहले पाँचबुँदे ज्ञापनपत्र बिहीबार परराष्ट्रमन्त्री एनपी साउदलाई बुझाइएको छ। निबर्तमान अध्यक्ष रविना थापा, बुद्धिसागर सुवेदी र ठाकुरप्रसाद ढुंगानाले परराष्ट्रमन्त्रीलाई विभिन्न विषयमा ध्यानाकर्षण गराउँदै ज्ञापनपत्र बुझाएका हुन्।

नेपाली नागरिक तथा प्रवासमा कार्यरत गैरआवासीय नेपाली नागरिकहरुसँग सम्बन्धित विषयलाई यथाशीघ्र सम्बोधन गर्न आग्रहसहित परराष्ट्रमन्त्रीलाई ज्ञापनपत्र बुझाइएको सुवेदीले बताए।

उनका अनुसार हमास समूहले इजरायलमा हमला गरी नेपाली युवा विपिन जोशीलाई बन्धक बनाएको धेरै दिन भएको अवस्थामा उनको रिहाइका लागि कूटनीतिक पहल तीव्र बनाउन आग्रह गरिएको छ।

यस्तै, अवैध बाटो हुँदै नेपाली नागरिकहरू विदेशी सेना (रुस) मा भर्ना भएका र भर्ना भएकाहरुमध्ये केही नेपालीको निधन भएका समाचारहरु सार्वजनिक भएको उल्लेख गर्दै ज्ञापनपत्रमा यस विषयमा नेपाल सरकारले स्पष्टसँग आफ्नो धारणा सार्वजनिक गरेर ती नेपाली नागरिकहरूलाई यथाशक्य छिटो नेपाल फर्काउन सार्थक पहल गर्न आग्रह गरिएको छ।

यसैगरी, मध्यपूर्वको बाटो हुँदै अवैधरुपमा विभिन्न देशमा पुग्ने नेपालीहरू ठगिने क्रम जारी रहेकाले यसलाई बन्द गर्नका लागि प्रत्येक दूतावासमा प्रहरी सहचारीको आवश्यकता रहेको जानकारी गराइएको छ। यसका लागि यथाशीघ्र व्यवस्था गर्न परराष्ट्रमन्त्रीको ध्यानाकर्षण गराइएको छ।

मध्यपूर्वमा अहिले सबैभन्दा ठूलो समस्याको रुपमा पासपोर्ट नवीकरणको विषय रहेको ज्ञापनपत्रमा उल्लेख छ।

‘अहिले पनि इराकमा झन्डै १२ हजार भन्दा बढी नेपालीहरु बस्दै आएकोमा अहिले त्यहाँ ६ सयभन्दा बढीको पासपोर्टको म्याद सकिएको अवस्था छ। जसले गर्दा उनीहरू इराकबाट बाहिर जान पाइरहेका छैनन्। यो विषयमा हामीले केही समयदेखि परराष्ट्र मन्त्रालयमा अनुरोध गर्दै आएका छौं। अझैसम्म त्यहाँ घुम्ती टोली नपुगेको हुँदा यथाशक्य छिटो टोली पठाई पासपोर्ट नवीकरणको लागि सहजीकरण गरिदिनुहुन अनुरोध गर्दछौं’, ज्ञापनपत्रमा भनिएको छ।

यस्तै, गैरआवासीय नेपाली नागरिकता वितरण भइरहेकोमा खुसी व्यक्त गर्दै अझै सहज तरिकाले पाउने व्यवस्था गर्न आग्रह गरिएको छ। ‘अहिले पनि कतिपय ठाउँहरुमा एनआरएन नागरिकताको अधिकारको विषयमा बुझाइमा एकरूपता आउन नसकेकाले सरकारी कार्यालयमा अप्ठेरो परेको कुराहरु हामीसँग आइरहेका छन। यस विषयमा पनि परराष्ट्रमन्त्रीको ध्यानाकर्षण गराएका छौं’ढुङ्गानाल भने।

हालै पोर्चुगलमा राजदूतावास स्थापना गर्ने निर्णय गरेर राजदूत सिफारिस गरिएकोमा नेपाल सरकारलाई हार्दिक बधाई ज्ञापन गर्दै माल्टा, रोमानिया,टर्की लगायत अन्य मुलुकहरुमा पनि राजदूतावास स्थापनाको पहल गर्न अनुरोध गरिएको छ।

माल्टा, रोमानिया, टर्की लगायतका देशमा नेपालीहरूको संख्या बढ्दै गएको र दूतावास नहुँदा राहदानी नवीकरण लगायतका कुराहरु अप्ठेरो परेको पनि जानकारी गराइएको छ। ती देशमा नेपाल सरकारले राजदूतावास स्थापना गर्ने निर्णय पनि गरिसकेको अवस्थामा कार्यान्वयन प्रक्रिया छिटो अघि बढाउन पनि अनुरोध गरिएको छ।

प्रवासमा रहेका नेपालीहरुको समसामयिक मागहरु लिएर परराष्ट्रमन्त्रीलाई भेटेर ज्ञापनपत्र बुझाएको निबर्तमान अध्यक्ष रविना थापाले बताइन्।