होबार्ट, तास्मानिया । नेपाली महिला दिदीबहिनीहरूको महान् पर्व हरितालिका तीजको अवसरमा नेपाली पाठशाला होबार्टले बालबालिकासँगै तीज मनाउने भएको छ। आइतबार होबार्टस्थित कासग्रोभ हाईस्कुलमा पाठशालाका बालबालिकासँगै तीज कार्यक्रम हुने भएको हो। 

नेपाली सोसाइटी अफ तास्मानियाले आयोजना गरेको उक्त तीज कार्यक्रममा दर खाने व्यवस्था पनि रहेको पाठशाला होबार्टले जनाएको छ। परम्परागत पोसाक लगाए तीज कार्यक्रममा आफ्ना बालबालिकालाई उपस्थित गराउन पाठशाला होबार्टले अभिभावकसँग आग्रह गरेको छ। 

साना नानीबाबुहरुलाई नेपाली कला संस्कृतिबारे जानकारी होस भन्ने उद्देश्य उक्त कार्यक्रमको आयोजना गरेको पाठशालाले जनाएको छ। बालबालिकासँग पाठशालाले मनाउन लागेको तीज कार्यक्रममा आफ्ना नानीबाबुलाई लिएर उपस्थित भइदिन होबार्टवासी नेपालीहरुलाई सोसाइटीका अध्यक्ष संसाराज चिमोरियाले अनुरोध गरेका छन्।