काठमाडौँ ।

आजदेखि सुरु हुने एसिया कप क्रिकेटमा नेपालले पाकिस्तानसँग प्रतिस्पर्धा गर्दैछ। पाकिस्तानस्थित मुल्तान स्टेडियममा नेपालले पाकिस्तानसँग प्रतिस्पर्धा गर्न लागेको हो। सो खेल नेपाली समय अनुसार दिउँसो ३ः१५ बजेबाट मा सुरु हुनेछ।

नेपालले पाकिस्तानविरुद्ध उद्घाटन खेलका लागि मैदानमा उत्रँदा नेपालका लागि एसिया कपमा डेब्यू पनि हुनेछ। नेपालले पहिलो पटक एसिया कप खेल्न लागेको हो।

नेपाल पाकिस्तानको सिनियर टिमसँग कुनै पनि फर्म्याटमा पहिलो पटक आमनेसामने हुन लागेको हो। एसिया कपले नेपाललाई एकदिवसीय अन्तर्राष्ट्रिय वरीयताको शीर्ष स्थानको पाकिस्तानसँग खेल्ने अवसर जुराएको छ।

नेपाल र पाकिस्तानबीचको खेलअघि उद्घाटन समारोह समेत आयोजना हुने तालिका रहेको छ।

समूह ‘ए’ मा रहेको नेपालले समूह चरणको दोस्रो तथा अन्तिम खेल भारतविरुद्ध श्रीलंकामा सेप्टेम्बर ४ मा खेल्ने तालिका रहेको छ। नेपालले भारतको सिनियर टोलीविरुद्ध पनि पहिलोपटक खेल्न लागेको हो। भारत पनि अहिले आईसीसीको एकदिवसीय वरीयताको तेस्रो स्थानमा छ।