ब्रिस्वेन अष्ट्रेलिया । 

महिलाहरुको महान् चाड हरितालिका तीजको अवसरमा गैर आवासीय नेपाली संघ (एनआरएनए) क्वीन्सल्याण्डले तीज विशेष कार्यक्रमको आयोजना गर्ने भएको छ।  सप्टेम्बर १५ तारिखका दिन स्ट्र्याथपाइन कम्युनिटी सेन्टर ब्रिस्वेनमा उक्त कार्यक्रमको हुन लागेको हो। 

नेपालका चर्चित कलाकार प्रकाश सपुत, प्रिति आले र सिन्धु मल्लको प्रस्तुति रहने आयोजना गरिने एनआरएनए क्वीन्सल्याण्डका नवनिर्वाचित संयोजक शम्भु गाईसीले जानकारी दिएका छन्। विगतका वर्षहरूमा भन्दा यो वर्ष केही फरक शैलीमा तीज कार्यक्रम गर्न लागेकाले यहाँ रहेका विभिन्न संघ–सस्थालाई सहकार्यका लागि उनले आह्वान गरेका छन्।

शुक्रबार साँझ ५ः३० बाट सुरु हुने कार्यक्रमको टिकट २५ अष्ट्रेलियन डलर तोकिएको संयोजक गाईसीले बताए। दर र खानाको स्टलहरू पनि उपलब्ध रहेको उनले जानकारी दिए। विशुद्ध सांगीतिक कार्यक्रम रहेकाले क्वीन्सल्याण्डमा रहेका नेपाली दीदीबहीनीहरुको सम्मानमा एनआरएनए क्वीन्सल्याण्डले बिगतका वर्ष झै कार्यक्रमको आयोजना गरेको उनको भनाइ छ। उनले तीज कार्यक्रमलाई स्पोन्सर गरेर सहयोग गर्न क्वीन्सल्याण्डबासी नेपाली व्यवसायीलाई आग्रह गरेका छन्। उनले कार्यक्रम कस्तो बनाउने भनेर पनि सुझाव मागेका छन्। 

उनले यस कार्यक्रमलाई भव्य र सभ्य रूपमा सम्पन्न गर्नका लागि क्वीन्सल्याण्डवासी नेपाली दाजुभाई तथा दिदीबहीनीको ठुलो सहयोगको अपेक्षा गरेको बताएका छन्।