लसएन्जल्स ।

मोरक्कोमा छायांकनरत हलिउड फिल्म ‘ग्लाडिएटर २’ को सुटिङ सेटमा विष्फोट हुँदा धेरैको संख्यामा क्रु सदस्य घाइते भएका छन्। फिल्म प्रोडक्सन कम्पनी पारामाउन्ट पिक्चरले भने पूर्व योजना अनुरुप स्टन्ट सिक्वेन्सको सुटिङ भइरहँदा ‘कम जोखिमपूर्ण दुर्घटना भएको’ दाबी गरेको छ।

कम्पनीले घाइतेहरुको अवस्था स्थिर रहेकोले उनीहरुको उपचार जारी राखेको जनाएको छ। साताको सुरुमा द सन पत्रिकाले सुटिङ सेटमा विष्फोट भएको र घाइते ६ जनालाई अस्पताल भर्ना गरिएको जनाएको थियो।

‘यो डरलाग्दो थियो। आगोको ठूलो गोला उड्यो र त्यो गोलामा क्रु सदस्यहरु परे। यतिका वर्षको फिल्मी अनुभवमा मैले त्यस्तो डरलाग्दो दृश्य कहिल्यै देखेको थिइनँ’, क्रुका एक सदस्यको भनाई उल्लेख गर्दै पत्रिकाले लेखेको थियो।

कम्पनीका प्रवक्ताले विष्फोट लगत्तै त्यहाँ सुरक्षाको उपाय अपनाउँदै चिकित्सकको टोलीले स्वास्थ्य सेवा प्रदान गरेको जनाएका छन्।

सन् २००० मा निर्माण भएको फिल्म ‘ग्लाडिएटर’को निर्देशन सर रिड्ले स्कटले गरेका थिए। फिल्मको सिक्वेल सन् २०२४ को नोभेम्बरमा रिलिज हुँदैछ। फिल्मको नाम हालसम्म टुंगो लागिसकेको छैन। सिक्वेलमा ‘नर्मल पिपुल’ अभिनेता पल मेस्कल, डेन्जल वासिङ्टन र कोनी निल्सनलगायतको अभिनय छ।

मूल ‘ग्लाडिएटर’ले पाँच ओस्कार जित्दा प्रमुख अभिनेता रसेल कोवेले ‘बेस्ट एक्टर’को अवार्ड उचालेका थिए।