काठमाडौँ ।

केलियन एम्पाप्पेको पहिलो कप्तानीमा फ्रान्सले युरो २०२४ को छनोटमा नेदरल्यान्ड्समाथि ४–० गोल अन्तरले जित निकालेको छ । गएराति घरेलु मैदान पार्क डेस प्रिन्सेसमा सम्पन्न खेलमा फ्रान्सको जितमा कप्तान केलियन एम्पाप्पेले २, उपकप्तान एन्टोइन ग्रिजमन र डेअट उपमेकानोले १–१ गोल गरे ।

खेलको दोस्रो मिनेटमा नै एम्बाप्पेको पासमा ग्रिजमनले गोल गर्दै फ्रान्सले सुरुआती अग्रता दिलाए । आठौँ मिनेटमा डेअट उपमेकानोले फ्रान्सको अग्रता दोब्बर पारे । २१औँ मिनेटमा एमबाप्पेले गोल गर्दै फ्रान्सलाई पहिलो हाफमै ३–० को अग्रता दिलाए ।

खेलको ८८औँ मिनेटमा एमबाप्पेले व्यक्तिगत दोस्रो गोल गर्दै फ्रान्सलाई ४–० को फराकिलो जित दिलाए । यो जितसँगै समूह ‘बी’ मा रहेको फ्रान्सले ३ अंक जोडेको छ । नेदरल्यान्ड्स भने अंकविहीन छ ।

यही समूहको अर्को खेलमा ग्रीसले जिब्राल्टारलाई ३–० ले हरायो ।