आगामी मार्च २६ तारिख आयोजना हुन लागेको टच फुटी वर्ल्डकपमा सहभागी हुन जाने अष्ट्रेलियन नेपाली टिमको जर्सी आज सार्वजनिक गरिएको छ । मेलबर्नको ग्लेनरोयमा रहेको ग्रेस ईन्टरनेशनलको शाखामा आयोजना गरिएको विशेष कार्यक्रममा अघिल्लो पटकको डिभिजन २ विजेता नेपाली टोलीको जर्सी सार्वजनिक गरिएको हो । यस पटक नेपालले डिभिजन १ बाट खेल्नेछ ।
कार्यक्रममा प्लाटिनम प्रायोजक ग्रेस ईन्टरनेशनलका सिईओ रामचन्द्र पौडेल र न्याभका अध्यक्ष प्रेमराज उप्रेतिले खेलाडीहरुलाई जर्सी प्रदान गरेका थिए । यसअघि अध्यक्ष उप्रेति, सिईओ पौडेलसहित जनसम्पर्क समितिका अध्यक्ष विनित शर्मा, म्याक्सीम्याक्स एजुकेशनका निर्देशक शंकर धरेल, कान्तिपुर दैनिकका खेलप्रमुख विनोद पाण्डे, नेपालका राष्ट्रिय क्रिकेट खेलाडी यशवन्त सुवेदी, न्याभ उपाध्यक्ष ललिसा थापा र खेल संयोजक दिप चन्दले संयुक्त रुपमा जर्सी सार्वजनिक गरेका थिए ।

को को छन् टिममा ?

नेपाली समूदायको तर्फबाट सहभागी हुने टिमको क्याप्टेनमा रोशन कँडेल रहेका छन् भने भाईसक्याप्टेनमा जेम्स थापा छन् । यस्तै खेलाडीहरुमा भिसिस दुरा, आदर्श पौडेल, रन्जन कँडेल, निश्चल अर्याल, प्रेरणा मल्ल, हिरामति मगर, प्रज्ञा दाहाल, सुरज श्रेष्ठ, प्रमोद घिमिरे र स्वजन कार्की छन् । यस्तै टिम प्रशिक्षकमा ससेन्द्र कसी, म्यानेजरमा बबी लामा र संयोजकका रुपमा दिप चन्द सहभागी हुँदैछन् ।

एकैदिनमा सम्पन्न हुने प्रतियोगितामा ९ जना खेलाडी समूहमा हुनेछन् । एउटा टिमबाट अधिकतम १५ खेलाडी सहभागी हुनसक्ने व्यवस्था छ । अष्ट्रेलियामा रहेका विभिन्न समूदायका १२ वटा टिम यसमा सहभागी हुँदैछन् । साउथ यारामा रहेको फकनर पार्कमामा हुने प्रतियोगितामा हरेक टिमले कम्तिमा तीन खेल खेल्नेछन् र यीमध्ये सबैभन्दा बढी स्कोर गर्न सफल दुई टिमबीच फाईनल प्रतिस्पर्धा गराइनेछ । नेपाल यस पटक डिभिजन एबाट स्पर्धामा उत्रिएको छ । प्रतियोगिताको आयोजना अष्ट्रेलियन फुटबल ईन्टरनेशनलले गरेको हो ।