काठमाडौँ ।

राष्ट्रपति विद्यादेवी भण्डारीको कार्यकाल आज (आइतबार) सकिँदैछ। उनी २०७४ फागुन २९ गते राष्ट्रपति निर्वाचित भएकी थिइन् । पाँच वर्षे कार्यकाल सकिएपछि राष्ट्रपति भण्डारी आइतबार नै शितल निवासबाट निजी निवासमा सर्ने तयारी गरेकी छन् ।

उनी आज शीतलनिवासबाट बुढानीलकण्ठ(२ चपलीस्थित निजी निवासमा सर्ने तयारीमा रहेको राष्ट्रपति कार्यालयले जनाएको छ । राष्ट्रपति भण्डारी आफ्नो दोस्रो कार्यकाल सकेर बिदा हुन लागेकी हुन्। उनी पहिलोपटक २०७२ कात्तिक ११ गते राष्ट्रपति चुनिएकी थिइन्। शितल निवासबाट भण्डारी बाहिरिएसँगै नयाँ राष्ट्रपतिको प्रवेश हुनेछ । बिहीबार (फागुन २५ गते) नयाँ राष्ट्रपतिमा रामचन्द्र पौडेल निर्वाचित भइसकेका छन्।

पौडेलले सोमबार शपथ लिने तय भएको छ। त्यसपछि उनी सोमबार नै निजी निवास बोहराटारबाट शितल निवास सर्ने बताइएको छ।