काठमाडौँ ।

प्रदेश १ को नाम नेपाल कम्युनिष्ट पार्टी र जनता समाजवादी पार्टी, नेपालले ‘किरात–लिम्बुवान–सगरमाथा’ राख्नु पर्ने भन्दै प्रस्ताव दर्ता गराएका छन् । 

नेकपा एमाले र नेपाली कांग्रेसले ‘कोशी’ नामकरण गर्नु पर्ने भन्दै प्रस्ताव दर्ता गराए पछि नेकपा एस र जसपा नेपालले लामो नाम ‘किरात–लिम्बुवान–सगरमाथा’ राख्नु पर्ने प्रस्ताव दर्ता गराएका हुन् । 

नेकपा एसका मुख्यमन्त्री राजेन्द्रकुमार राईको प्रस्ताव र जसपाकी सांसद तथा मन्त्री निर्मला लिम्बूको समर्थनमा उक्त प्रस्ताव दर्ता भएको संसद् सचिवालयले जनाएको छ ।

नेकपा एमालेको प्रस्ताव र नेपाली कांग्रेसको सर्मथनमा ‘कोशी’ नाम यसअघि नै दर्ता भइसकेको छ । एमालेको ४० र कांग्रेसको २९ मत रहेकाले बहुमतका आधारमा सहजै प्रदेश नामको प्रस्ताव पारित हुनेछ । आवश्यक ६३ मत भन्दा बढी ६९ मत रहेकाले काँग्रेस एमालेको प्रस्ताव पारित हुने देखिएको छ ।

एमाले कांग्रेसको प्रस्तावलाई माओवादी केन्द्रले पनि समर्थन जनाउन सक्ने भएकाले आजै नामकरण हुने गरी प्रदेश संसद् सचिवालयले कारबाही अघि बढाएको छ । अपराह्न १ बजेको बैठक बोलाए पनि सहमतिको  प्रयास जारी रहेको भन्दै अझै बैठक सुरु भएको छैन ।