काठमाडौँ । अभिनेता दयाहाङ राई र अभिनेत्री प्रकृति श्रेष्ठको मुख्य भूमिका रहेको चलचित्र ‘बिहेपास’को आधिकारिक टिजर सार्वजनिक भएको छ । प्रेमकथामा आधारित यो चलचित्रमा पहिलोपटक दयाहाङ र प्रकृतिले स्क्रिन सेयर गरेका छन् । उक्त चलचित्रको करिब साढे १ मिनेट लामो टिजर बुढा सुब्बा डिजिटलमार्फत दर्शकमाझ ल्याइएको हो ।

विवाहपछि श्रीमानसँगै अष्ट्रेलिया बस्दै आएकी प्रकृति लामो समय चलचित्रबाट टाढिइन् । उनले चलचित्र ‘होस्टल’बाट डेब्यु गरेकी थिइन् ।

प्रवेश पौडेलको निर्देशनमा रोहित कटेल र रत्न श्रेष्ठले निर्माण गरेको फिल्ममा दयाहाङ र प्रकृतिका साथमा श्याम राई, विशाल पहाडी,सुवास गजुरेल, हिउँवाला गौतम, रुषा न्यौपाने, नवीन शेरचन, उमा बानियाँ र प्रकाश भुजेलले अभिनय गरेका छन् । शिव ढकालले खिचेको फिल्मका गीतमा प्रवेश मल्लिकको संगीत, डिपी खनालको गीत, शैलेन्द्र प्रधानको पाश्र्व संगीत छ । रामजी लामिछानेको कोरियोग्राफी रहेको फिल्म मित्र गुरुङले सम्पादन गरेका हुन् । मर्रे केर, आकाश बराल र सजन काफ्लेको कथा रहेको फिल्मको पटकथा र सम्वाद भने आकाश र सजनले तयार पारेका हुन् ।

टिजरमा विवाहको लागि युवतीको मन जित्न प्रमुख पात्रले बुन्ने योजना र यर्थात थाहा पाएपछि आउने उतारचढावलाई कथामा आधारित बनाएर देखाइएको छ । चलचित्र बैशाख १ गते प्रदर्शनमा आउने भएको छ ।