काठमाडौं, ८ सेप्टेम्बर २०२६ । अष्ट्रेलियाकी विदेशमन्त्री सिनेटर पेनी वोङले आज अष्ट्रेलियास्थित नेपाली दूतावासको भ्रमण गर्दै नेपालमा हालै आएको विनाशकारी बाढी तथा पहिरोबाट प्रभावित परिवार र समुदायप्रति अष्ट्रेलिया सरकारको ऐक्यबद्धता दोहोर्‍याएकी छन्।

नेपाल–चीन सीमाक्षेत्रमा गत अगस्ट २६ मा आएको विनाशकारी बाढी र पहिरोका कारण ठूलो मानवीय तथा भौतिक क्षति भएको छ। विपत्तिपछि अष्ट्रेलियाले नेपालमा उद्धार, मानवीय सहायता र प्रभावित अष्ट्रेलियाली नागरिकको खोज तथा पहिचानका लागि आफ्नो संयन्त्र थप सक्रिय बनाएको छ।

विदेशमन्त्री वोङको दूतावास भ्रमणका क्रममा नेपालमा कार्यरत अष्ट्रेलियाली अधिकारीहरूको गतिविधि, प्रभावित क्षेत्रमा भइरहेको खोज तथा उद्धार प्रयास र अष्ट्रेलियाली नागरिकको अवस्थाबारे जानकारी लिइएको बताइएको छ।

अष्ट्रेलियाली सरकारले यसअघि नेपालका बाढी प्रभावित समुदायका लागि ११ मिलियन अष्ट्रेलियन डलर मानवीय सहायता उपलब्ध गराउने घोषणा गरिसकेको छ। साथै, अष्ट्रेलियाले खोज तथा उद्धार कार्यमा सहयोग पुर्‍याउन ड्रोन विशेषज्ञसहितको Disaster Assistance Response Team नेपाल पठाउने निर्णय गरेको थियो।

अष्ट्रेलियाली विदेश मन्त्रालयका अनुसार नेपालमा रहेका अष्ट्रेलियाली नागरिकको अवस्था पहिचान गर्न तथा प्रभावित परिवारलाई कन्सुलर सहयोग उपलब्ध गराउन अधिकारीहरू नेपाली सरकार, स्थानीय निकाय तथा अन्य साझेदार संस्थासँग निरन्तर समन्वयमा छन्।

यसअघि विदेशमन्त्री वोङले नेपालमा आएको विपत्तिप्रति गहिरो दुःख व्यक्त गर्दै अष्ट्रेलियाली नागरिक तथा उनीहरूका परिवारलाई सहयोग गर्न सरकार प्रतिबद्ध रहेको बताएकी थिइन्। ७ सेप्टेम्बरमा उनले अष्ट्रेलियाली संसदमा नेपाल बाढी विपत्तिबारे शोक प्रस्तावसमेत प्रस्तुत गरेकी छन्।

नेपालमा जारी उद्धार तथा पुनःस्थापना प्रयासबीच अष्ट्रेलियाको उच्चस्तरीय चासो र प्रत्यक्ष कूटनीतिक सक्रियतालाई नेपाल–अष्ट्रेलिया सम्बन्ध तथा मानवीय सहकार्यको महत्वपूर्ण संकेतका रूपमा हेरिएको छ।