काठमाडौं । नेपालमा आएको विनाशकारी बाढी तथा पहिरोबाट प्रभावित नागरिकको उद्धार, राहत तथा पुनःस्थापनाका लागि अष्ट्रेलियाले सहयोगलाई थप विस्तार गरेको छ।

अष्ट्रेलियाली सरकारले नेपाल सरकारको अनुरोधपछि मानवीय सहायता र खोज तथा उद्धारका लागि विशेषज्ञ टोली परिचालन गरेको हो। तत्कालीन राहत तथा पुनःस्थापनाका लागि अष्ट्रेलियाले हालसम्म ८० लाख अष्ट्रेलियन डलर बराबरको मानवीय सहायता घोषणा गरेको छ।

अष्ट्रेलियाले आर्थिक सहयोगसँगै विपद् व्यवस्थापनमा दक्ष जनशक्ति र अत्याधुनिक प्रविधिसमेत नेपाल पठाएको छ। खोज तथा उद्धार कार्यमा सहयोग पुर्‍याउन ड्रोन प्रविधिमा विशेषज्ञता हासिल गरेका अष्ट्रेलियाली आपत्कालीन सेवा अधिकारीहरू नेपाल पुगेका छन्।

उद्धार तथा खोजी कार्यमा सहयोग गर्न अष्ट्रेलियन फेडरल पुलिसका विपद् पीडित पहिचान विशेषज्ञहरू पनि परिचालन गरिएको छ। उनीहरूले विपद्का कारण ज्यान गुमाएका तथा बेपत्ता व्यक्तिको पहिचानमा नेपाली अधिकारीलाई सहयोग गर्नेछन्।

अष्ट्रेलियाली सरकारले नेपालमा रहेका आफ्ना नागरिकको अवस्थाबारे जानकारी लिन तथा उनीहरूका परिवारलाई आवश्यक कन्सुलर सहयोग उपलब्ध गराउन पनि विशेष संयन्त्र परिचालन गरेको जनाएको छ।

यसैबीच, नेपालमा रहेका बाढीपीडितका लागि अष्ट्रेलियामा रहेका नेपाली समुदायले समेत राहत अभियान तीव्र बनाएका छन्। विभिन्न नेपाली संघसंस्था, सामाजिक संस्था तथा समुदायका सदस्यहरूले आर्थिक सहयोग संकलन गर्नुका साथै राहत सामग्री जुटाउने अभियान सञ्चालन गरिरहेका छन्।

अष्ट्रेलियाको रेडक्रससहित विभिन्न मानवीय संस्थाहरूले पनि नेपालका विपद् प्रभावित नागरिकका लागि सहयोग जुटाइरहेका छन्।

विपद्ले ठूलो जनधनको क्षति पुर्‍याउनुका साथै सडक, पुल, घर तथा अन्य महत्वपूर्ण पूर्वाधारमा समेत क्षति पुर्‍याएको छ। तत्कालीन उद्धार र राहतपछि प्रभावित परिवारको पुनःस्थापना तथा क्षतिग्रस्त पूर्वाधार पुनर्निर्माण दीर्घकालीन चुनौतीका रूपमा देखिएको छ।

नेपालको संकटमा अष्ट्रेलियाली सरकार र अष्ट्रेलियास्थित नेपाली समुदायबाट भइरहेको सहयोगले दुई देशबीचको मानवीय सम्बन्धलाई थप बलियो बनाएको छ। विपद्को यस कठिन समयमा नेपाललाई अन्तर्राष्ट्रिय सहयोगको आवश्यकता अझै रहेको छ।