मेलबर्न अष्ट्रेलिया ।

सुपरहिट नेपाली चलचित्र बोक्सीको घरको मेलबर्नमा थप दुई ‘शो’ हुने भएको छ। दर्शकको माग अनुसार मेलबर्नमा फिल्मको दुई शो थपेको मुग्लान इन्टरटेनमेन्टका निर्देशक सन्देश श्रेष्ठले जानकारी दिए। यो भन्दा अगाडी दुई ‘शो’ को टिकट दुई दिनमा बिक्री भएको उनले बताए। फिल्म बोक्सीको घरले मेलबर्नमा दर्शकको राम्रो साथ पाएको छ। 

फिल्म बोक्सीको घरको तेस्रो ‘शो’ मे १७ र चौथो ‘शो’ मे २० तारिख हुने निर्देशक श्रेष्ठले बताए। साँझ ६ बजेबाट सुरु हुने दुबै ‘शो’ को टिकट अनलाईबाट खरिद गर्न सकिने उनको भनाइ छ। सिट संख्या सीमित रहेकाले समयमा टिकट खरिद गरी आफ्नो सिट सुरक्षित गर्न उनले मेलबर्नवासी नेपाली फिल्म प्रेमीहरूलाई आग्रह गरेका छन्। 

सत्य घटनाबाट प्रेरित फिल्म मण्डला नाटक घरमा मञ्चन गरिएको सोही शीर्षकको नाटकबाट तयार गरिएको हो। फिल्ममा शीर्ष पात्रमा केकीले अभिनय गरेकी छन्। सुलक्षण भारतीद्वारा निर्देशित फिल्ममा केकीसँगै रमा थपलिया, सुपला सापकोटा, श्वेच्छा राउत, सुष्मा निरौला, सबिन बास्तोला आदिको पनि अभिनय रहेको छ। फिल्ममा निर्देशक बद्री अधिकारी निर्माता र राज घिमिरे कार्यकारी निर्माता रहेका छन् भने लाइन प्रोड्युसर रुपक अधिकारी हुन्।

फिल्म ‘बोक्सीको घर’ को अष्ट्रेलियामा वितरण तथा प्रदर्शनको अधिकार एमएसएम इन्टरटेनमेन्टले लिएको छ। 

फिल्म ‘बोक्सीको घर’ को मेलबर्न ‘शो’ हेर्न चाहनु हुनेले यहाँ क्लिक गरेर टिकट खरिद गर्न सकिने छ।