काठमाडौं ।

क्यानडा–११ सँगको तीन खेलको एक दिवसीय क्रिकेटको दोस्रो खेलमा मंगलबार जित निकालेपछि कप्तान सन्दीप जोराले नयाँ टिमका लागि यो नतिजा उत्साहजनक रहेको बताएका छन्।

क्यानडामाथि दुई विकेटको जितपछिको पत्रकार सम्मेलनमा बोल्दै जोराले टिमका सदस्यहरुले योजनाअनुसार प्रदर्शन गरेका कारण जित सम्भव भएको बताए।

उनले भने, ‘टोलीमा हामी सबै नयाँ छौं। आजको जित हाम्रो लागि ऐतिहासिक हो। एकदम खुसी लागेको छ। क्यानडाले दिएको लक्ष्य पछ्याउनेबारे हामीले प्लान गरेका थियौं, सोहीअनुसार खेल्यौं।’

क्यानडासँगको यस शृंखलाले क्यानमा आबद्ध सबै खेलाडीका लागि अवसर भएको भन्दै शृंखला जित्ने विश्वास रहेको उनले बताए। मुलपानी मैदानमा मंगलबार भएको दोस्रो खेलमा नेपालले क्यानडालाई २ विकेटले पराजित गरेको थियो।

नेपालको जितसँगै सिरिजमा १–१ को बराबरी भएको छ। यसअघि पहिलो खेलमा क्यानडा विजयी भएको थियो। अब बिहीबार तेस्रो तथा निर्णायक खेल हुनेछ।

नेपालको जितमा बसिर अहमद र कप्तानको भूमिका रहेका सन्दीप जोराले अर्धशतक हिर्काएका थिए। सन्दीपले ६६ रन जोडे भने बसिरले नटआउट ५२ रन जोडे। रशिद खानले जोडेको ४७ रन पनि नेपालको जितको आधार बन्यो।