काठमाडौँ ।

आईसीसी पुरुष क्रिकेट विश्वकप लिग–२ अन्तर्गत नेपालमा जारी त्रिकोणात्मक एकदिवसीय अन्तर्राष्ट्रिय सिरिजमा नेदरल्यान्ड्सले नामिबियालाई पराजित गरेको छ। कीर्तिपुरस्थित त्रिवि क्रिकेट मैदानमा आज (सोमबार) भएको खेलमा नेदरल्यान्ड्सले नामिबियामाथि ७ विकेटको शानदार जित निकालेको हो।

जितका लागि १२४ रनको लक्ष्य नेदरल्यान्ड्सले २७ ओभर २ बलमा ३ विकेटको क्षतिमा पूरा गर्याे। नेदरल्यान्ड्सलाई जित दिलाउन माइकल लेभिटले ५७ रन तथा म्याक्स ओुदाउदले २८ रन बनाए। नामिबियाका जेरहार्ड इरासमसले तीनवटै विकेट हात पारे।

यसअघि टस हारेर पहिले ब्याटिङ गरेको नामिबियाले ३५ ओभर १ बलमा सबै विकेट गुमाएर १ सय २३ रन बनायो। नामिबियाका लागि जेजे स्मिथले २६ तथा रुवेन ट्रम्पलम्यानले २० रन बनाए।

नेदरल्यान्ड्सका लागि आर्यन दत्तले सर्वाधिक ६ विकेट हात पार्दा कायल क्लेनले २ विकेट लिए। यसअघि नामिबियाले नेपाललाई ४ विकेटले पराजित गरेको थियो भने नेपालले नेदरल्यान्ड्सलाई ९ विकेटले हराएको थियो।