काठमाडौं ।

फिल्म ‘मायाका रंगहरु’को दुई गीत रेकर्ड गरिएको छ। छायांकनको तयारीमा रहेका फिल्मका गीतको गत शुक्रबार राजधानीमा रेकर्ड गरिएको हो । दुई गीतमध्ये एकमा गायिका मेचु धिमालको शब्द, संगीत तथा स्वर रहेको छ। यो गीतमा उनलाई गायनमा नोगेन हारुसारुम्बा लिम्बुले साथ दिएका छन्।

अर्को गीतमा उर्गेन दोङको शब्द, संगीत र स्वर छ। यो गीतको गायनमा उनलाई ‘द भ्वाइस अफ नेपाल सिजन ५’ की मोनिका राईले साथ दिएकी छन्। फिल्ममा अभिनेता पल शाह र कुन्दन भारद्वाज, सुनिल थापा र बुद्धि तामाङ अनुबन्धित भैसकेका छन्।

केवल तामाङको निर्माण तथा डेब्यु निर्देशकिय फिल्मको छायांकन फागुन अन्तिम सातादेखि भारतको सिक्किममा सुरु हुनेछ। फिल्मका लागि हालसम्म अभिनेत्री फाइनल भइसकेका छैनन्। प्रमिस इन्टरटेनमेन्टको ब्यानरमा निर्माण हुने फिल्मको छायांकन भारतको दार्जिलिङ, इलाम र काठमाडौंमा पनि गरिनेछ । पुनम तामाङ प्रस्तुतकर्ता रहको फिल्मको निर्माता आरबी थाङदेन हुन्।

फिल्ममा भद्र भुजेल र रामा मेहराको मुख्य सहायक निर्देशन, सौरभ लामाको डिओपी, शेखर ज्ञवालीको कथा, तारा प्रकाश लिम्बु, उर्गेन दोङ, मेचु धिमाल र दीपक शर्माको संगीत, सुष्मा सोनम, रामजी लामिछाने र कृष्ण तामाङको कोरियोग्राफी रहनेछ।

फिल्मका सह–निर्माता जेनिश न्यौपाने र दिपेन्द्र चिलवाल हुन्। फिल्मको हेड अफ प्रोडक्सन तथा लाइन प्रोडुसरमा सिक्किमबाट टीकाराम अधिकारी, दार्जिलिङबाट सुवास छेत्री र नेपालबाट पदम तामाङ रहनेछन्।