काठमाडौं ।

आगामी फागुन १८ गतेबाट रिलिज हुने फिल्म ‘अगस्त्य च्याप्टर १’ले फिल्मकी प्रमुख नायिका मलिका महतको लुक्स सार्वजनिक गरेको छ। सार्वजनिक लुक्समा मलिकालाई फिल्मभित्र ‘चाँदनी’ चरित्रमा देखाइएको छ।

फिल्म निर्माण पक्षले यसअघि सौगात मल्ल, नाजिर हुसेन र निश्चल बस्नेतको क्यारेक्टर लुक्स सार्वजनिक गरिसकेको छ।

निर्माण पक्षले फिल्मको टिजर सार्वजनिक गर्नु तीन दिन अघि मलिकाको लुक्स बाहिर ल्याएको हो। फिल्ममा सौरभ चौधरीको निर्देशन छ। फिल्ममा प्रमोद अग्रहरी, विजय बराल, रवीन्द्र झालगायतका कलाकारको पनि अभिनय छ।

डार्क हर्स इन्टरटेन्मेन्ट र सेभेन सिज इन्टरटेन्मेन्टको प्रस्तुतिमा तयार भएको यो फिल्ममा प्रकाश मल्ल, अनिष तामाङ र विनोद पौडेलको लगानी छ। फिल्मका कार्यकारी निर्माता विश्व गौचन र अभिषेक चौधरी हुन्।