मेलबर्न, अष्ट्रेलिया ।

सत्तारुढ लिबरल पार्टीका एक उम्मेद्वारका लागि यहाँ रहेका नेपालीहरुले आयोजना गरेको फन्डरेजिंग डिनरमा १५ मिनेटमै १५ हजार डलर सहयोग जुटेको छ । लिबरल फ्रेन्डस अफ नेपाल भिक्टोरियाको आयोजनामा भएको कार्यक्रममा नेपाली समूदायका हस्तीहरु सहभागी थिए । एनआरएनका पूर्वअध्यक्ष शेष घले, जमुना घले, भिक्टोरियाका नेपाली महावाणिज्यदूत चन्द्र योन्जनदेखि एनआरएनका पूर्वअध्यक्षहरु टोनु घोताने, केशव कँडेलसहित कार्यक्रममा सहभागी थिए । घोताने त आफैं यो जमघटको आयोजनाकर्ताहरुको संयोजक समेत हुन् ।

केविसीखबरसँग कुरा गर्दै घोतानेले सहायक अर्थमन्त्री, हाउजिंग र होमलेसनेस, सोसियल एण्ड कम्युनिटी हाउजिंगका मन्त्री समेत रहेका माईकल सुक्करको चुनावी अभियानलाई सहायोग गर्न नेपाली समूदायको तर्फबाट कार्यक्रम आयोजना गरिएको थियो । छिट्टै नै लिबरल फ्रेन्डस अफ नेपाल भिक्टोरियालाई औपचारिक रुपमा नै सुरुवात गर्ने योजना रहेको घोतानेले सुनाए ।

कार्यक्रममा मेलबर्नमा रहेका ५० भन्दा बढी नेपालीमूलका व्यवसायीहरु सहभागी थिए । माईकल सुक्करले लिबरल पार्टीको ईतिहास, जनताका लागि यसले गरेका कामहरु र आगामी दिनमा बहुसांस्कृतिक समाजको प्रबद्र्धनमा ल्याउने नीतिका विषयमा आफ्नो धारणा राखेका थिए ।

एनआरएनका पूर्वअध्यक्ष एवं एमआईटीका संस्थापक शेष घलेले सत्तारुढ लिबरल पार्टीले कोरोना महामारीका बेला व्यवसाय र व्यवसायीलाई जोगाउने जबकिपर र जबसिकर जस्तो लोकप्रिय कार्यक्रम ल्याएपनि चुनावमा त्यसको जस लिन नसकेको धारणा राखेका थिए । कार्यक्रममा बोल्दै महावाणिज्यदूत चन्द्र योन्जनले लिबरल पार्टीलाई यहाँको सबैतहमा लैजानुपर्ने धारणा राखेका थिए ।

उक्त अवसरमा नेपालीहरुले भिक्टोरियामा बनाउन लागेको बहुसांस्कृतिक केन्द्रका लागि लिबरलको तर्फबाट के सहयोग हुन सकिन्छ भन्ने विषयमा अध्यक्ष राजेश आचार्यले प्रस्तुति समेत दिएका थिए ।

माईकल सुक्करले यहाँको डेकिन क्षेत्रको प्रतिनिधित्व गर्दछन् । उक्त क्षेत्रबाट सन् २०१३ देखि नै उनी विजयी हुँदै आएका छन् । यस पटकको निर्वाचनमा समेत उनी उम्मेद्वार भएका छन् ।