Logo

काठमाडौं उपत्यकामा चाडपर्व लक्षित ‘यात्रु सहायता कक्ष’



काठमाडौं, ७ असोज । महानगरीय ट्राफिक प्रहरी महाशाखाले चाडपर्वलाई लक्षित गरी ‘यात्रु सहायता कक्ष’ सञ्चालनमा ल्याएको छ । काठमाडौंको गोंगबुस्थित नयाँ बसपार्कमा स्थापना भएको यात्रु सहायता कक्षको उद्घाटन गरी बिहीबारदेखि विधिवत रुपमा सेवा दिन सुरु गरेको हो । कार्यक्रममा ट्राफिक प्रहरी महाशाखाका प्रहरी अधिकृत, स्थानिय प्रहरी, यातायात व्यवसायी, सामुदायिक सेवा केन्द्रका प्रतिनिधि, ल्होत्से बहुउद्देश्यीय प्रालिका अध्यक्ष, ट्राफिक स्वयमसेवक, बिभिन्न संघसंस्थाका प्रतिनिधि र यात्रुहरूको उपस्थिति रहेको थियो ।

टिकट सम्बन्धी कुनै पनि समस्या पर्दा समाधानका लागि विभिन्न स्थानमा ‘यात्रु सहायता कक्ष’ स्थापना गर्ने योजना स्वरुप नयाँ बसपार्कमा कक्ष स्थापना गरि सुरु गरिएको महाशाखाका प्रमुख प्रहरी वरिष्ठ उपरीक्षक (एसएसपी) जनक भट्टराईले बताउनुभयो । उहाँले यात्रुका गुनासो सुन्ने र सोही स्थानबाट सहयोग गर्ने उद्देश्य रहेको जानकारी दिनुभयो । उहाँका अनुसार दशैँ मान्न उपत्यका छाडी आ–आफ्नो थातथलो फर्किने यात्रुहरुलाई बढी भाडा लिने, यात्रु ठगी गर्ने, टिकट लगायत अन्य यातायात सम्बन्धी समस्याहरुलाई सहजता दिलाउन कक्षले काम गर्नेछ ।

कक्षले यात्रु तथा आफ्नो मालसामानको सुरक्षा सम्बन्धी सुसूचित गराउने, जनचेतनामूलक पर्चा पम्प्लेट बितरण गर्नेछ । त्यस्तै कोरोना संक्रमणबाट बच्न मास्कको प्रयोग गरी स्वास्थ्य मापदण्डको अनिवार्य पालना गर्न समेत कक्षले सचेत गराउने छ । यात्रु सहायता कक्ष भएका स्थानहरुमा निशुल्क मास्क वितरण समेत हुनेछ । महाशाखाले उपत्यकामा टिकट काउन्टर रहेका र यात्रुको बढि भीडभाड हुने १४ स्थानमा कक्ष स्थापना गर्नेछ । बिहीबारबाट नयाँ बसपार्क, गौशाला, बल्खु र कोटेश्वरमा कक्ष शुरु भएको छ ।

आइतबारसम्म सातदोबाटो, कलंकी, नागढुङ्गा, स्वयम्भू, माछापोखरी, चाबहिल, जगाती, सुन्धारा, रत्नपार्क र फर्पिङमा कक्ष राखी संचालनमा ल्याइने जानकारी महाशाखाले दिएको छ । दशैंमा घर जान लामो तथा मझौला दूरीका अग्रिम टिकट बुकिङ खुला हुने हुँदा त्यस्ता स्थानहरुमा यात्रुको भिडभाड र हुनसक्ने समस्यालाई समाधान गर्न कक्षहरु सक्रिय भई काम गर्ने छन् ।

कक्षले फर्जी टिकट बेच्ने र डबल टिकट काट्ने, टिकट कालोबजारी गर्ने, यात्रुलाई सास्ती दिने अनधिकृत व्यक्तिहरु माथि निगरानी गर्ने, पकेटमार लगायतका गतिबिधि निगरानी गर्न छुट्टै सादा पोसाकमा समेत ट्राफिक प्रहरीको टोली परिचालन गरिने महाशाखाका प्रवक्ता तथा प्रहरी उपरीक्षक संजीव शर्मा दासले बताउनुभयो । चाडपर्वमा उपत्यकाबाट बाहिर जाने यात्रुको सहजताका लागि उपत्यकाको टिकट काउन्टर रहेका विभिन्न स्थानमा प्रत्येक वर्ष दशैँदेखि छठसम्म यस्ता यात्रु सहायता कक्ष स्थापना गर्दै आएको प्रवक्ता दासले जानकारी दिनुभयो । यात्रु सहायता कक्षमा ट्राफिक प्रहरी, नेपाल प्रहरी, सामुदायिक सेवा केन्द्र तथा यातायात व्यवसायी रहने छन् ।

चाडपर्वको समयमा मादक पदार्थ सेवन गरि सवारी चलाउने, तीब्र गतिमा सवारी चलाउने, क्षमताभन्दा बढी यात्रु राख्ने, लेन अनुशासनको पालना नगर्दा दुर्घटनाको जोखिम समेत बढ्न सक्ने हुनाले त्यसलाई न्युनिकरण गर्न समेत सहायता कक्षले प्रभावकारी भूमिका खेल्ने महाशाखाले जनाएको छ ।