काठमाडौं । कुनै आधार नभएको भन्दै प्रमुख दलहरुले सरकारका विरुद्ध लगातार आक्रमण गरिरहेका बेला राष्ट्रिय स्वतन्त्र पार्टीका सभापति रवि लामिछानेले भने जेलबाट छुटे लगत्तै निरन्तर सरकारको बचाउ गर्दै अघि बढ्न ढाडस दिँदै आएका छन् । आईतबार राति बालुवाटारमा भएको भेटमा पनि रास्वपा सभापति लामिछानेले सरकारले गरेको कामहरुको समर्थनगर्दै सरकार र जेनजी समूहबीच भएको सम्झौता कार्यान्वयनमा जोड दिएका छन्।

आइतबार प्रधानमन्त्री सुशीला कार्कीसँग भेटवार्ताका क्रममा लामिछानेले जेनजीसँगको सम्झौता हुबहु कार्यान्वयन हुनुपर्ने बताएका हुन्।

बैठकपछि सञ्चारकर्मीसँग कुरा गर्दै सरकारका प्रवक्ताले फागुन २१ गते हुने प्रतिनिध सभा निर्वाचनको तयारी निरन्तर राख्न लामिछानेले आग्रह गरेको बताए । उनले निर्वाचनका लागि राज्यले सम्पूर्ण ध्यान केन्द्रित गर्न, अध्यादेशमार्फत आवश्यक कानुन ल्याउन र निर्वाचन आयोगलाई आवश्यक पर्ने सरसामग्रीको तत्काल व्यवस्था गर्न पनि प्रधानमन्त्रीको ध्यानाकर्षण गराए।

जवाफमा प्रधानमन्त्री कार्कीले सरकार निर्वाचनमा केन्द्रित रहेको र तोकिएकै मितिमा निर्वाचन हुनेमा ढुक्क रहन आग्रह गरिन्। उनले निर्वाचन बिथोल्न वा सार्न खोज्नेहरू सक्रिय हुनसक्ने भन्दै दलहरूले पनि सबै ध्यान निर्वाचनमै केन्द्रित गर्नुपर्ने बताइन्।

प्रधानमन्त्री कार्कीलाई भेट्न सभापति लामिछाने उपसभापति डीपी अर्याल र स्वर्णिम वाग्ले लगायत नेतालाई लिएर आइतबार साँझ बालुवाटार पुगेका थिए। भेटवार्तामा गृहमन्त्री ओमप्रकाश अर्याल र सञ्चार तथा सूचना प्रविधिमन्त्री जगदीश खरेल सहभागी थिए।

सहकारी ठगी प्रकरणमा शुक्रबार कारागारबाट रिहा भएका उनी आज पार्टी बैठकको अध्यक्षता गरी प्रधानमन्त्रीसँग भेट गर्न बालुवाटार पुगेका हुन्।

प्रधानमन्त्री कार्कीसँग लामिछानेको यो पहिलो भेट हो। लामिछानेले जेलबाट छुटे लगत्तै सरकारप्रति समर्थन जनाएका थिए।

प्रधानमन्त्री कार्की प्रमुख राजनीतिक दलका शीर्ष नेताहरूसँग भने भेट गर्न अनिच्छुक रहँदै आएकी छन्।