मेलबर्न, अष्ट्रेलिया ।
प्रधानमन्त्री सुशीला कार्कीले एनआरएनका अभियन्ताहरुलाई राजनीतिक दलको प्रभावबाट संस्थालाई मुक्त गर्न आग्रह गरेकी छिन् । काठमाडौंमा आयोजना गरिएको एकता हस्ताक्षर कार्यक्रममा उपस्थित प्रधानमन्त्री कार्कीले एकपटकको नेपाली सधैंको नेपाली भएको धारणा समेत राखिन् । उनले नागरिकताका विषयमा देखिएको अप्ठेरो विस्तारै हटेर जाने विश्वास पनि व्यक्त गरिन् । आफ्नो सरकारले यसमा पहल गर्ने र नयाँ आउने संसदले पनि यसलाई सकारात्मक रुपमा लैजाने विश्वास उनको थियो । बालुवाटारमा आयोजना गरिएको कार्यक्रममा गत पाँच वर्षदेखि एनआरएनमा छुट्टै समूह खोलेर अघि बढेको महेश श्रेष्ठ समूह र आफुलाई मूल एनआरएनका रुपमा क्रियाशील बद्री केसीबीच एक समझदारीपत्रमा हस्ताक्षर भएको हो । सरकारले विवादलाई कायमै राखेको अवस्थामा एनआरएनलाई खारेज नै गरेर जाने भन्दै दबाब दिएपछि एकताको विन्दुमा दुबै समूह आइपुगेको बुझिएको छ ।

प्रधानमन्त्रीको सरकारी निवास बालुवाटारमा आयोजना गरिएको एक विशेष समारोहमा बोल्दै महेश श्रेष्ठले एकताका लागि पहल गर्ने सबैलाई धन्यवाद दिए । उनले अब एकताबद्ध अधिवेशन सम्पन्न गर्ने जिम्मेवारी संस्थामा आइपरेको बताए । उनले सहमति, सहकार्य र एकता एनआरएनमा देखिएको र देशमा पनि यस्तै एकता आबश्यक भएको बताए ।

कार्यक्रममा बोल्दै अध्यक्ष डा. बद्री केसीले चार वर्ष अल्मलिएको बताए । उनले मतान्तरको कारणले तिक्तता समेत हुनपुगेको स्वीकार गरे । तर, एघारौं महाधिवेशनबाट निर्वाचित टिम र एकताको अधिवेशनबाट बनेको टिमबीच निरन्तर सम्वाद र सहकार्यका कारणले विश्वासको वातावरण निर्माण गर्न सफल भएको बताएका थिए । यसपछिको रोडम्याप के हो त ? उनले स्पष्ट पारे, अब हामी तीन चार महिना भित्रै एकताको महाधिवेशन गर्छाैं । यसका लागि यो दुई तीन महिनामा के गर्ने भन्ने सबै समझदारी भइसकेको छ । यसपछि राजनीतिक कोणबाट कुनै विभाजन नहुने सुनिश्चितता हुने अवस्था निर्माण गरिने पनि उनले प्रतिबद्धता जनाए ।

उनले गैरआवासीय नेपाली नागरिकता प्राप्त गरे पनि त्यसले काम गर्न नसकेको बताउँदै यसले सरकारलाई नै चुनौती खडा गरेको बताए । यसको समाधानका लागि सरकारले काम गर्ने विश्वास उनले व्यक्त गरे ।

कार्यक्रममा बोल्दै सञ्चरमन्त्री जगदीश खरेलले एकताको लागि बधाई दिए । उनले सहमतिपत्रमा गरिएको हस्ताक्षर कागजमा मात्र होइन मन र मस्तिष्कमा कायम रहोस् भन्ने कामना समेत गरे । उनले फुटेर हैन जुटेर ८० लाख नेपालीहरुमाझ उत्साहको सञ्चार गराउन पनि आग्रह गरेका थिए । उनले एनआरएनलाई राजनीतिमुक्त बनाएर पार्टीभन्दा माथि उठ्न पनि आग्रह गरेका थिए ।

प्रधानमन्त्रीको भनाई यस्तो छ

संघलाई एकसूत्रीय अभियानमा लैजाने क्रममा आज एउटा कोशेढुंगा स्थापित भएको मान्नुपर्छ । मिलेर जाँदा राम्रो हुन्छ, फुटेर जाँदा राम्रो हुँदैन । अब गैरआवासीय नेपाली संघको आफ्नो हित के हो ? पहिलो त त्यो आफ्नो हेर्नुपर्यो । विदेशमा जाने भन्नेवित्तिकै सबै सुखी त हुँदैन । निकै परिश्रम गर्नुपर्छ । परिश्रम गरेर नै स्थापित हुने हो । मेहनत नगर्नेहरु स्थापित हुन पनि सक्दैनन् । कठिनाई भोगेर कति जीवन व्यतित गरेको पनि देखिन्छ । मेहनतपछि मात्रै सफलता आउँछ । विदेशमा बस्नेहरुलाई स्वतः आफ्नो मुलुकको माया हुन्छ, माटोको माया हुन्छ । विदेशमा गयो त्यहाँ काम गर्न आएको हुँ भन्ने हुन्छ । तर, मुलुकको माटोको गन्ध अर्कै हुन्छ । आपसमा साथीभाईबीच भेट्दा स्वर्ग आए जस्तो हुन्छ । जतिकै विदेशमा गएर बस्न परेपनि, सुख सुविधा भएपनि आफ्नो मुलक त आफ्नै हुन्छ । एनआरएनहरुले म नेपालको हैन, यसको कुनै लगाव छैन भन्ने सोच्न हुन्न । होला नागरिकताले एउटा रुप देखाइदियो होला त्यसमा अलिकति सेकेन्ड क्लास जस्तो देखायो होला । अथवा कतिपय सुख सुविधा र कारोबार गर्न कठीन भएको पनि होला । तर, मेरो सल्लाह के छ भने तपाईंहरु नेपाली हुँ भनेर नेपालप्रति जति सद्भाव देखाउनुहुन्छ । यहाँका आफन्तहरुसँग त्यति नै अरुले नेपाली होइन, नेपालीले पाउने सेवा सुविधाबाट बञ्चित गर्छन् होला जस्तो लाग्दैन । जतिकै भएपनि पहिचान भन्ने कुरा पहिचान नै हुन्छ । अहिले त देख्नुभएको होला हरेक मुलुकमा नयाँ भावनाको अभिबृद्धि हुँदै गएको पाईन्छ । ईम्रिगेन्टहरुलाई सकेसम्म नआओस् भन्ने खालको वातावरण बन्दै गएको छ । कोही पढ्न जानुभयो होला, कोही रोजगारीको लागि जानुभयो होला । मुलुकमा कुनै बाटो नदेखेपछि वितृष्णा आएर गएको पनि हुनसक्छ । म नेपाली होइन, दोश्रो दर्जा भएँ भन्ने सोच्न भएन । यहाँ बस्दाबस्दै मिल्छ । जो विदेशमा छन् उनीहरुले नेपालमा आफ्नो एउटा टेक्ने ठाउँ भए पनि राख्नुपर्छ । सम्पत्तिको सुरक्षा मिलाउनैपर्छ ।
जहाँसम्म गैरआवासीय नेपाली संघको प्रश्न छ, मुलुकले आशा गरेको छ । रोजगारीकै आशा पनि गरेको छ । विद्वान छन् केही परिवर्तनमा सहायता गर्न सक्छ कि भन्ने पनि सोचेको हुन्छ । तपाईंहरु आजको दिनमा मिल्नुभो, जुट्नुभो, अस्ती अस्ती आगलागीमा, भूकम्पमा पनि साथ दिएकै हो । नहुनुपर्ने घटना भयो, त्यतिबेला शान्त नेपालमा काण्ड भयो । त्यसमा पनि कतिपय सहयोग एनआरएनले गरेको छ । आफन्तहरुलाई पनि गर्नुभएको होला त्यसका लागि धन्यवाद पनि दिन्छु । यहाँहरुको बलियो उपस्थिति भयो । एक हुनुभो, पदका कुरालाई लिएर राजनीतिक दलभित्र के भइरहेको छ तपाईंहरु बुझ्नुभएको छ । तपाईंहरु आज मिलेजस्तो दलहरुबीच या दलभित्र पनि मेलमिलापको आवश्यकता छ । नेता नेता फुटेको देखिन्छ । विभिन्न दलको पनि एक आपसमा पानी बाराबारको अवस्था देखिन्छ । त्यसरी त देश चल्दैन नि । पार्टीमा पनि एउटाले जित्ने एउटाले हार्ने हुन्छ । गल्ती भएको औंल्याउने हो । पद नै खोस्न त जाँदैन नि । बाहिर बस्नेले अर्को पटकको अपेक्षा गरेर बसिरहन्छ । उसले गरेको विरोधलाई मूल्यांकन गरेर बहालवालालाई नदिएर विपक्षीलाई पनि दिन सक्छन् । तपाईंहरुले मिल्नुभो यो राम्रो उदाहरण हो । यताबाट जाने नेपालीहरुलाई सहयोग गरेकै छ । सहयोग गरिरनुहुन्छ ।
नागरिकताको विषयमा, हामी पनि गर्छाैं, नभए अर्को संसदले पनि केही गर्ला । आज तपाईंहरु मिल्नुभएकोमा बधाई दिन्छु र तपाईंहरुको यो एकता कायम रहोस् भन्ने कामना पनि गर्दछु ।