मेलबर्न, अष्ट्रेलिया । भिक्टोरिया राज्य सरकारले वेष्टगेट टनेल सञ्चालन, ९ किलोमिटर लामो मेट्रे टनेल र मेट्रो ट्रेनको नयाँ स्टेशनहरुको सुरुवात लगायतलाई ध्यानदिँदै आगामी फेब्रुअरी महिनासम्मका लागि हरेक सप्ताहन्त अर्थात् शनिबार र आईतबार निःशुल्क सार्वजनिक यातायात दिने भएको छ ।
यस्तो सेवा रेलमा मात्र नभएर भिक्टोरियाभरीको सार्वजनिक यातायातमा लागू हुनेछ । सामान्यतया क्रिसमस र नयाँ वर्षमा यस्तो सेवा दिँदै आएको पब्लिक ट्रान्सपोर्ट भिक्टोरियाले यस पटक भने राज्यभरको नेटवर्कमा निःशुल्क सेवा दिन लागेको छ ।
ट्रेन र बस सेवाहरुका लागि माईकी प्रयोग गर्नुपर्ने छैन । तर, लामोदूरीको सेवाका लागि भने पहिले नै बुक गर्नुपर्नेछ ।
यससँगै आगामी जनवरी १ तारिखबाट भिक्टोरिया राज्यमा १८ वर्षभन्दा कम उमेरका सबैलाई निःशुल्क यातायात सेवा दिइने भएको छ । मुख्यत विद्यार्थीहरुलाई लक्षित गरिएको यस कार्यक्रमले हरेक बालबालिकाको वार्षिक ७ सय डलरभन्दा बढी बचत गर्नेछ । यद्यपि निःशुल्क भएपनि यसका लागि माईकी भने लिन आवश्यक पर्नेछ ।
भिक्टोरियामा जसिन्टा एलान नेतृत्वको सरकारले पूरा गरेको मेट्रो टनेलको योजना यसअघिका प्रिमियर ड्यानियल एन्ड्रयूको पालामा सुरु गरिएको थियो । बिचमा कोभिड १९ का कारण केही समय पछि धकेलिएपनि अन्ततः १० वर्षको समय लागएर यो पूरा गरिएको छ । यसको लागत बढेको भन्दै विपक्षीहरुले विरोध गरेका छन् ।