काठमाडौं । प्रधानमन्त्री केपी शर्मा ओलीले चिनियाँ राष्ट्रपति समक्ष लिपुलेख र लिम्पियाधुरा हुँदै दुई देशले व्यापार मार्ग खोल्ने सम्झौता गरेकोमा आपत्ति जनाएका छन् । चीन भ्रमणमा रहेका प्रधानमन्त्री ओलीले चिनियाँ राष्ट्रपति सी चिनफिङसँगको सामूहिक भेटमा चीन(भारतबीचको व्यापार सम्झौतामा आपत्ति जनाउँदै लिपुलेक, लिम्पियाधुरा नेपालकै रहेको स्पष्ट पारेका छन् ।

भ्रमणमा जानुअघि राष्ट्रपति सीसँगको एकल भेटमा सीमाको विषय उठाउने भनिएपनि ओलीले चीनको थियानजिन अतिथि गृहमा शनिबार भएको द्विपक्षीय सामूहिक भेटवार्तामै यो कुरा उठाएका थिए । उनले ऐतिहासिक तथ्य र पुरानो नक्साले लिपुलेक, लिम्पियाधुरा नेपालको हो भन्ने पुष्टि भइसकेको विषय रहेको स्पष्ट पारे । भारत र चीनबीच युद्ध हुँदा त्यो भूमिमा भारतले अस्थायी रूपमा फौज राख्न अनुमति मागेको र त्यही अनुरूप त्यतिबेला अनुमति दिइएको प्रधानमन्त्री ओलीले चिनियाँ पक्षलाई जानकारी गराए ।

‘त्यो भूमि भारतको होइन, नेपालको हो । लिपुलेक पास हुँदै चीन र भारतबीच हालै भएको व्यापार सम्झौताप्रति हाम्रो आपत्ति छ । कुनै पनि देशको जनसंख्या र भूगोल ठूलो(सानो हुन सक्छ तर, सार्वभौम सत्ता जुनसुकै देशको बराबर हुन्छ । यो कुरा हाम्रा छिमेकीले बुझिदिनुपर्छ । चीन र भारतबीच भएको उक्त व्यापार सम्झौता फिर्ता हुनुपर्छ । त्यो फिर्ता गर्न चीन तयार हुन पर्छ’, प्रधानमन्त्री ओलीले चिनियाँ पक्षसँगको भेटमा भने, ‘यस मामिलामा चीनले नेपाललाई सहयोग गर्नेछ भन्ने हाम्रो विश्वास रहेको छ ।’

प्रधानमन्त्री ओलीले सन् १८१६ को सुगौली सन्धिबमोजिम महाकालीपूर्वका भूभागहरू सार्वभौम मुलुक नेपालका रहेको उल्लेख गरे ।

प्रधानमन्त्री ओलीले सीमा विवादमा कुनै पनि देशको स्वीकृतिविना कुनै सम्झौता हुन नसक्ने स्पष्ट पारे । ‘नेपालको भूमि लिपुलेक लिम्पियाधुराबारे पनि नेपाललाई थाहा नदिइकनै अरु कुनै पनि देशले नेपालको भूमिबारे सम्झौता गर्न सक्दैनन् । म यस विषयमा ध्यानाकर्षण गराउन चाहन्छु’, प्रधानमन्त्री ओलीले भने ।

केही समय पहिले नेपालका दुई छिमेकी राष्ट्र भारत र चीनले लिपुलेक पास हुँदै दुई देशबीचको व्यापार सम्झौता गरेका थिए । जसबारे सरकारले कूटनीतिक नोट समेत पठाएको थियो भने सदनमा समेत आवाज उठेको थियो ।

चीनको थियानजिन शहरमा आयोजना हुने शाङ्घाई सहयोग संगठन (एससीओ) को शिखर सम्मेलनमा भाग लिन प्रधानमन्त्री ओली नेतृत्वको नेपाली प्रतिनिधिमण्डल शनिबार नै चीन पुगेको थियो ।

चीन पुगेलगत्तै चीनका राष्ट्रपति सीसँग द्विपक्षीय भेटवार्ता भएको हो । भेटका अवसरमा दुई देशबीचको मित्रवत् सम्बन्ध र सहकार्यका विविध क्षेत्रमा कुराकानी भएको प्रधानमन्त्री ओलीको सचिवालयले जनाएको छ ।