होबार्ट, अष्ट्रेलिया ।

“विविधताभित्र विभिधता” नाराका साथ आगामी अप्रिल १३ तारिख अर्थात् नेपाली नयाँ वर्ष २०८२ को अवसरमा आयोजना गरिने कार्यक्रममा तास्मानियाकी गभर्नर सहभागी हुने भएकी छन् । आयोजक नेप्लीज सोसाईटी अफ तास्मानियाकि अध्यक्ष रोजिना ताम्राकारका अनुसार गभर्नर बार्बरा बेकर उनका श्रीमान प्रोफेसर डन काल्मर्स सहित सहभागी हुने टुंगो लागिसकेको छ । ग्लेनोर्की सिटी काउन्सिलको सहयोगमा सोसाईटीले गर्न लागेको कार्यक्रममा नयाँ वर्षको शुभकामना आदान प्रदानका साथै अन्त्यमा आतिशबाजी पनि गरिनेछ । यस्तै नयाँ वर्षको उत्सवमा सहभागी हुनका लागि ग्लेनोर्की सिटी काउन्सिलकी मेयर सु हिकी लगायत बहुसांस्कृतिक समाजका अगुवाहरु सहभागी हुनेछन् ।

विक्रम सम्वतको नयाँ वर्ष २०८२ लाई अष्ट्रेलियाका विभिन्न राज्यमा मनाउने गरिन्छ । गभर्नरकै उपस्थितिमा कुनै राज्यमा मनाउन लागिएको भने पहिलो पटक हो । तास्मानियामा नेपाली भाषा सबैभन्दा बढी बोलिने भाषामध्ये पर्दछ । यहाँ नेपाली जनसंख्याका साथै नेपालीभाषी भूटानीहरुको पनि बाक्लो बसोबास छ ।

नयाँ वर्षको दिन अर्थ र ईकोज व्याण्डले कन्सर्ट गर्नेछ भने नेपाली विभिन्न जातजातिका परम्परागत पहिनमा सजिएर सांगीतिक प्रस्तुति दिने तयारी छ । यी प्रस्तुतिहरुमार्फत कथा पनि भन्ने योजना छ । यस्तै बालबालिकाहरुको लागि कार्यक्रमस्थलमा विभिन्न मनोरञ्जनात्मक गतिविधिहरु समेटिनेछ । नेपालीसँगै र अन्य चिनियाँ, भारतीय र सोमोवा र अन्य समूदायले पनि आफ्ना प्रस्तुतिहरु दिनेछन् ।

अध्यक्ष ताम्राकारले नेपाली नयाँ वर्षको अवसरमा आयोजना गरिएको कार्यक्रममा सहभागी भएर यसलाई भव्य बनाइदिन आग्रह गरेकी छिन् । दिउँसो २ बजेदेखि राति ८ बजेसम्म नयाँ वर्ष महोत्सवकै रुपमा कार्यक्रम हुनेछ । यस्तै औपचारिक कार्यक्रम दिउँसो करिब ५ बजे सुरु हुने बताइएको छ । कार्यक्रम निःशुल्क हुनेछ ।