तास्मानिया, अष्ट्रेलिया ।

लोकप्रिय नेपाली लोक(रक ब्याण्ड कन्दरा ले आफ्नो अष्ट्रेलिया यात्रा २०२५ को चौथो श्रृङ्खला तास्मानियाको राजधानी होबार्टमा भव्य रूपमा सम्पन्न गरेको छ। नेपाल फेस्टिभल २०२५ को विशेष सांगीतिक प्रस्तुति अन्तर्गत आयोजना गरिएको यो कन्सर्ट होबार्टका नेपाली संगीतप्रेमीहरूका लागि एक ऐतिहासिक क्षण सावित भयो।

कार्यक्रमको मुख्य आकर्षण कन्दराका कालजयी लोकपप गीतहरू थिए, जसले दर्शकहरूको मनमा गहिरो प्रभाव छोड्यो। जब “बिदेसिनु लेखियो कर्मैमा, भाला रोपी नबोल मर्मैमा‘” जस्ता भावनात्मक गीतहरू गुञ्जिए, तब तास्मानियाको चिसो मौसमलाई दर्शकहरूको जोश, उत्साह, र माया ले गर्मायो। नेपाली कला, भाषा, र साहित्यको समिश्रण झल्कने यी गीतहरूले प्रवासमा रहेका नेपालीहरूलाई आफ्नो माटोसँग अझ नजिक बनाएको थियो ।

हामीले कन्दरा व्याण्डका मुख्य गायक विवेक श्रेष्ठलाई होबार्टको अनुभवबारे सोधेका थियौं, उनले भने, “बालबालिकादेखि वृद्धसम्म, सबै उमेर समूहका दर्शकहरू कन्दराका संगीतमा रमाए, झुमे, र नेपाली लोकपप गीतहरूका शब्दहरू गाइरहे। यसले नेपाली संगीतको प्रभाव विश्वव्यापी रूपमा बढ्दै गएको स्पष्ट संकेत दियो जस्तो लाग्छ । कार्यक्रम अवधिभर दर्शकहरूको अटुट ऊर्जा, तालि, नृत्य, र स्वरहरूको गुञ्जन ले माहोललाई गौरवपूर्ण बनायो ।”

कन्दराले अष्ट्रेलियाको विभिन्न राज्यहरूमा निरन्तर नेपाली लोक-पप संगीतको प्रतिनिधित्व गर्दै आएको छ। यस अघिका प्रस्तुतिहरू मेलबर्न, सिड्नी, र एडिलेडमा भव्य रूपमा सम्पन्न भइसकेका छन्। तस्मानियामा सम्पन्न यस चौथो श्रृङ्खलाले पनि नेपाली संगीतको उपस्थितिलाई अझ दरिलो बनाउँदै नेपाली संस्कृति र पहिचानलाई सम्मानपूर्वक अघि बढाउने कार्य गर्यो।

एडिलेडको नेपाल फेष्टिभलबाट सुरु भएको कन्दराको अष्ट्रेलिया टूरका अझै दुईवटा कन्सर्ट बाँकी नै छन् । ब्रिसबेन र न्यूक्यासल । त्यसपछि वल्र्ड टूर अन्तर्गत युके, जपान लगायतका देशमा लाग्नेछ कन्दरा । तास्मानिया कन्दरा र विवेक श्रेष्ठका लागि पोखराकै झल्को दिने खालको थियो । विवेक थप्छन् “कार्यक्रमको सफल आयोजनाका लागि नेपाल फेस्टिभल २०२५ को आयोजक समिति, स्थानीय समुदाय, स्वयंसेवक, तथा प्रायोजकहरूलाई हार्दिक आभार । यस्तै समर्थन, माया, र साथले नै कन्दराले आफ्नो सांगीतिक यात्रालाई अझ मजबुत बनाइरहेको छ।”

यस ऐतिहासिक सांगीतिक यात्रालाई निरन्तरता दिँदै कन्दरा अब आफ्नो अष्ट्रेलिया यात्राको अर्को गन्तव्य ब्रिस्बेन तर्फ प्रस्थान गर्दैछ। ब्रिसबेनको मुटु किंग जर्ज स्क्वायरमा आयोजना हुने नेपाल फेष्टिभलको सांगीतिक आकर्षण कन्दरा हुनेछ । सिड्नी र मेलबर्नपछि सबैभन्दा बढी नेपाली बसोबास गर्ने शहरको रुपमा ब्रिसबेनलाई चिनिन्छ ।

नेपाल फेष्टिभल हरेक दुई वर्षमा नेपालीहरुले आफु बसेको ठाउँमा आफ्नो गीत, संगीत, परम्परा र नेपालीपनलाई उत्सवका रुपमा मनाउने थलो हो । नेपाल फेष्टिभलमा कन्दराका कालजयी गीतहरुलाई फेरि एक पटक गुन्गुनाउने अवसर पाउनु खुशीको विषय त हो नै यसमा सहभागिता लामो ईतिहास बोकेको नेपालको सांगीतिक व्याण्डलाई सम्मान दिने अवसर पनि हो ।