काठमाडौं । यतिबेला सचिन परियारको एकाएक चर्चा छ तर यो कुनै गीत या अन्य विषयले होइन उनी आफ्नै मृत्युका कारण यस्तो अवस्थामा पुगेका हुन् । कसैको मृत्यु पनि यतिबेला टक अफ द टाउन बनेको छ । महाराजगञ्जस्थित त्रिवि शिक्षण अस्पतालमा उनको बिहीबार बिहान १०: ४५ मा निधन भएको हो सामाजिक सञ्जालमा भाईरल हुने र आफ्नो स्वास्थ्यलाई नै बजारको चर्चाको विषय बनाउने भनेर उनको धेरैले आलोचना पनि गर्छन् । उनी मात्र होइन, उनको बाबुका गतिविधिका कारणले पनि बेला बखत चर्चा पाउने गर्दछन् । प्रधानमन्त्री केपी शर्मा ओलीले उनको निधनमा शोक मात्र व्यक्त गरेनन् भाईरल संस्कृति र त्यसले निम्त्याउनसक्ने खतराबारे सचेत पनि गराएका छन् ।

अस्पतालमा उपचारत चिकित्सकका अनुसार सचिनलाई जन्मजात भेन्ट्रिकुलर सिस्ट भएको थियो । दुर्लभ ब्रेन ट्युमर हो, जुन १० लाख जनसंख्यामध्ये तीन जनामा मात्र हुन्छ । जसका लागि न्युरोसर्जरी समेत गरिएको अस्पतालले जनाएको छ ।

लामो समयदेखि स्वास्थ्य समस्यासँग लड्दै आएका सचिनलाई पछिल्लो तीव्र ज्वरो, सास फेर्न गाह्रो हुने समस्याका कारण गत हप्ता अस्पताल भर्ना लगिएको थियो । अस्पतालमा भर्ना गर्दा उनको अवस्था गम्भीर थियो ।

चिकित्सकका अनुसार सचिनलाई अस्पतालमा भर्ना गर्दा ‘सेप्टिक सक’मा थिए । सेप्टिक सकको अवस्था भनेको शरीरमा संक्रमण तीव्र गतिले फैलिरहँदा शरीरका अंगलाई चाहिने रगत, अक्सिजन र पोषक तत्वलगायतका तत्वको कमी भई अवस्था गम्भीर हुनु हो ।

साथै, उनलाई डाइबेटिज इन्सिपिडसको पनि समस्या थियो । चिकित्सकका अनुसार डाइबिटिज इन्सिपिडसको समस्या निकै दुर्लभ हुन्छ । यो समस्या भएका व्यक्तिको मिर्गौलाले अत्यधिक मात्रामा पिसाब बनाउने गर्छ ।

सचिनको ६ महिनाअघि नै त्रिवि शिक्षण अस्पतालमा मस्तिष्कमा जमेको पानीलाई कम गर्न शल्यक्रिया गरेर पाइप राखिएको थियो । साथै, सचिनको समस्या बढ्दै गएर कम्मरमुनिको भाग समेत नचल्ने अवस्था आइसकेको थियो । उनलाई निमोनिया, छातीमा संक्रमण, मिर्गौलामा चोटपटक भएको थियो । जसकारण शरीरमा संक्रमण तीव्र फैलिंदा शरीरबाट रगत अत्यधिक बगिरहेको थियो ।

उपचारको क्रममा पीआईसीयू हुँदै भेन्टिलेटरमा राखेर उपचार गरिएको थियो । मुख र नाकबाट रगत बगेको थियो । भर्ना भएको पाँचौं दिनमा उनको फोक्सोबाट अचानक रक्तस्राव भएको अस्पतालले जनाएको छ ।

सचिनको शरीरका सबैजसो अंगले क्रमशस् काम गर्न छोडेका थिए । शरीरमा अक्सिजन पनि कम हुँदै जँदा अचानक हृदयघात भएपछि उनको मृत्यु भयो । चिकित्सकले हरसम्भव प्रयास गर्दा पनि उनलाई बचाउन नसकेको अस्पताल प्रशासनले जनाएको छ ।