होबार्ट, तास्मानिया । तास्मानियामा दोस्रो दशैँ सुपर सिक्स क्रिकेट प्रतियोगिता हुने भएको छ। तास्मानिया नेप्लिज क्रिकेट एसोसियसन (टिएनसिए)ले उक्त प्रतियोगिता अक्टोबर ७ र ८ गते पेम्ब्रोक ओवल, सोरेल क्रिकेट मैदानमा गर्न लागेको हो। ग्रेस इन्टरनेस्नल एजुकेसन एण्ड माइग्रेसन टाइटल स्पोन्सर रहेको प्रतियोगिता खेल्न ९ टिमले नाम दर्ता गरेको टिएनसिएका अध्यक्ष कमल भण्डारीले जानकारी दिए। 

उनका अनुसार सहभागी टिममा काठमाडौँ वारियर्स (ए), काठमाडौँ वारियर्स (बी) एक्सपर्ट क्रिकेट क्लब, यती क्रिकेट क्लब, मुनलाइट क्रिकेट क्लब, गोर्खा लिजेन्डस्, क्यापिटल क्रिकेट क्लब (ए), क्यापिटल क्रिकेट क्लब (बी) र लन्चेन्स्टन क्रिकेट क्लबरहेका छन्। 

क्रिकेटमा सुपर सिक्स नयाँ फर्म्याट हो। एक टिममा ६ जना खेलाडी खेल्न पाउनेछन् तर पाँच जना खेलाडीले मात्रै बलिङ गर्न पाउनेछन्। जम्मा पाँच ओभर गर्ने र एक ओभर ८ बलको हुने छ।

समूह चरणका खेलहरूको अंकका आधारमा शीर्ष स्थानमा रहने २ टोलीले फाइनल खेल्नेछन्। प्रतियोगिताको उपाधि जित्ने टिमले एक हजार अष्ट्रेलियन डलर, दोस्रो हुनेले पाँच सय अष्ट्रेलियन डलर नगद मेडल र प्रमाणपत्र पाउने अध्यक्ष भण्डारीले जानकारी दिए।