Logo

दक्षिण अफ्रिकामा कोरोनाका नयाँ भेरिएन्ट भेटिएको वैज्ञानिकहरुको दाबी !



काठमाडौं,९ मंसिर (रासस) । दक्षिण अफ्रिकाका वैज्ञानिकहरुले धेरै म्युटेसन भएको कोरोनाको नयाँ रुप पत्ता लागेको बताएका छन् । उनीहरूले दक्षिण अफ्रिकामा संक्रमण संख्या बढ्नुलाई कोभिडको यही प्रकार दोषी रहेको बताएका छन् । ‘दुःखको कुरा, हामीले एउटा नयाँ विविधता भएको भाइरस पत्ता लगायौँ र यो नै दक्षिण अफ्रिकामा संक्रमण दर बढ्नुको कारण हुनसक्छ,’ भाइरोलोजिस्ट टुलियो डे ओलिभेराले पत्रकार सम्मेलनमा भने ।
बी.१.१.५२९ वंश संख्या मानेको यस भेरिएन्टमा ‘धेरै संख्यामा उत्परिवर्तनहरू’ रहेको उनले बताए । दक्षिण अफ्रिकाबाट आएका यात्रुमाझ बोत्स्वाना र हङकङमा पनि यो पत्ता लागेको उनले बताए ।
स्वास्थ्य मन्त्री जो फाहल्लाका अनुसार बिरामीमा देखिएको समस्याका पछाडि यो विविधता ‘गम्भीर चिन्ताको’ विषय भएको छ । दक्षिण अफ्रिकामा यस महिनाको सुरूतिर १०० जनाको दरमा दैनिक कोभिड सङ्क्रमित देखिएकोमा बुधबारको संक्रमण एक हजार २०० भन्दा बढी पाइएको छ ।
गत वर्ष दक्षिण अफ्रिकामा यो भाइरसको ‘बीटा’ भेरिउन्ट भेटिएको थियो यद्यपि अहिलेसम्म यहाँ संक्रमितहरूमा डेल्टा भेरिएन्ट नै बढी पाइएको थियो । डेल्टा भेरिएन्ट सुरुमा भारतमा पत्ता लागेको थियो ।
अफ्रिका महादेशभरमा सबैभन्दा धेरै महामारीबाट प्रभावितको संख्या दक्षिण अफ्रिकामा छ, जहाँ लगभग २९ लाख ५० हजार सङ्क्रमित पुगेका छन् र त्यसमध्ये ८९ हजार ६५७ जनाको मृत्यु भएको छ ।